Hendenan cu ta bati porta pa asistencia social a redobla na Dakota

Pedro “Shon Pe” Krozendijk di Asistencia Social di Parokia di Dakota ta haya cu e necesidad social den e bario aki a aumenta. Un par di añanan pasa nan tabatin un lista di alrededor di 50 hende y actualmente el a redobla.

Nan tin mas cu shen hende cu ta ricibi e tipo di ayudo of asistencia social aki den forma di productonan di prome necesidad, entre nan comestibel y productonan di limpiesa of pa higiena personal. Tambe nan tin dos klas caminda e miembronan di Asistencia Social di Parokia di Dakota ta zorg pa e muchanan haya uniforme y articulonan escolar.

“Si bo ta mira con el a aumenta, mi ta kere cu e ta grandi. Nos no por tapa e solo cu un dede”, e ta bisa Bon Dia Aruba.

Recaudacion fondo
E hendenan cu ta bati nan porta pa ayudo ta mas cu antes, locual ta exigi pa nan bin cu mas actividad manera e koffiemorgen di diadomingo ultimo pa recauda fondo y yuda e famianan den necesidad na Dakota. Shon Pe a bisa cu semper e meta tras di e koffiemorgen aki ta pa recauda fondo pa asina por ‘yuda famianan di menos recurso di nos parokia’.

Mirando cu nan ta hiba un bon registracion, nan ta ripara cara nobo, ya cu tur diaranson e hendenan aki den necesidad ta haya un pakete di ayudo. “Nos ta haya hendenan cu ta bin tur ora y nos ta haya cara nobo tambe”, e ta indica.

Shon Pe ta laga sa cu e colecta di e koffiemorgen aki no tin nada di haber cu e fondo pa renoba e misa Birgen di Fatima na Dakota. Aña pasa nan a haya so loke ta donacion di clubnan social manera Kiwanis, Lions Club, etc. y e ayudonan aki cu nan a ricibi a contribui pa Asistencia Social di Parokia di Dakota por a mantene nan cabes ariba awa. Ya cu e actividad cu nan a organisa nan fondonan a bay pa e renobacion di e misa cu pronto lo tuma luga. Tambe algun miembro di e team di asistencia social ta forma parti di e comision di renobacion di e misa.

Pero e aña aki obligatoriamente nan mester destina loke a wordo recauda den e koffie morgen pa e fondo di Asistencia Social di Parokia di Dakota. Ya cu nan fondo ta cabando, considerando cu e productonan ta caro y tin mas hende cu mester di ayudo, y e placa no ta mucho mas. “Mester haci algo pa trece bek, pasobra e trabou tin cu sigui”, segun Shon Pe .