Yiu di nos hermana isla Curacao, Caithlin Chong a imigra cu su mayornan pa Aruba na anja 2003. Di Aruba pa Hulanda, e hoben ta comparti cu Bon Dia Aruba su storia. E hoben cu kier a bira dokter a caba ta studia moda.

E hoben ta conta “Cu mi 4 aña mi mayornan a dicidi pa muda pa Aruba, door cu mi wela a bira hopi malo y pa mi mama por a pasa mas tempo cu su Mama na e momento dificil. Desde September 2016 mi ta studiando moda na Universidad di Arte Utrecht ( HKU) y mi ta bibando den Utrecht. Mi a logra obtene mi propodeuse di biaha y actualmente mi ta den mi segundo anja escolar. Mi a gradua Havo na Colegio Arubano den 2015.”

Studia moda
Chong cu tabata convenci e lo bira dokter, desde chikito a topa su mes cu un revelacion y un otro pasion. Pa su suerte, su mayornan tabata completamente sostene su decision.

“Desde mucha creciendo mi pensamento tabata pa mi a bira un gyneacologo. Nunca mino a pensa echt verder un otro profesion paso ta doktor mi a kier a bira. Mi ta corda un biaha mi a bay cerca mi tante anto el a dunami un tarea di skets un curpa y a base di esaki mi a echt cuminsa pensa hey, esaki ta leuk y mi por hasi algo cu moda. Corto despues di esaki mi a sigui mi prome workshop di moda ku Art Rules Aruba cu a wordo duna dor di Christina Madry y esaki a habri mi wowo cu mi pasion ta creciendo dia pa dia pa cu esaki y cu e mundo rondo di moda ta algo hopi grandi. Y mi a sintimi na cas cu mi a haña algo ku mi ta gusta con mi ta bay sigui kune y kiko tur mi por hasi pa mi por realisa mi sonjo pa mi por drenta un academia” Chong ta comenta

Atelier 89’
Chong ta credita Atelier 89’ grandemente pa su logro di por a drenta un academia di arte.
Tambe, e ta subraya su persistencia mirando cu e orarionan di e tayernan no tabata facil.
“Mi a inscribi mi mes na Atelier’89 serca meneer Elvis Lopez. Akinan mi a inicia cu cosnan basico di arte y sigi pa diferente workshop unda mi a crea un portfolio. Mi a demostra y duna di mi banda pa cu mi escogencia, paso desde mi cu mi tawata den 4 Havo, mi tawata bai Atelier ’89 di dialuna pa diahuebs di 6.30 pa 9.30 y na momento cu tin presentacion esey tawata casi tur dia te ora cu e show tuma lugar. Y tur esaki mi tawata hasi banda di mi lesnan regular di skol y SE y examen.”

Industria di moda
Durante su corto tempo na HKU, e hoben a haya hopi informacion tocante mundo di moda. Tambe e ta conta Bon Dia Aruba cu e lo kier bin bek Aruba y duna bek na e isla pa medio di tayernan di moda na hobennan cu ta interesa. Pa finalisa e ta duna su opinion tocante moda na Aruba y pakico tur hende ta parse di bisti mesun cos. “Tocante di moda na Aruba mi tabata pensa cu casi tur hende ta cana rond den e mesun tipo di panja, si no tabata Sasha tabata di Mango. Mi tawata echt kere ku otro pais nan mas grandi tin cos mas leuk dor cu nan tin mas stores. Locual cu mi a sinja akinan na HKU tur cos ta “all about fast fashion” E rason di con nos tur ta bisti mesun cos ta gewoon dor cu esei ta local ku ta wordo produci masalmente y si bo ta desea algo unico bo mes tin cu cumpre den exterior of bo ta bai gasta placa riba un label cu ta produci riba un scale mas chikito con cu bai bin y tur hende ta bai keda bisti mesun cos pa motibo cu ku eta sali nan mas economico.”