Un biaha mas e falta di responsabilidad di algun ciudadano cu ta simplemente laga nan desperdicio unda cu ta benta ta capta atencion di diferente persona, incluyendo turista, riba rednan social.

Un usuario a publica varios potret den cual por mira cu un grupo di persona cu a pasa un dia na lama a simplemente laga nan desperdicio, y hasta stoelnan di lama cu tabata kibra, montona banda di piedranan na Boca Catalina. Dos ciudadano di bon curason a tuma accion pa recoge e desperdicio aki y benta esaki afo den un bari di sushi.

“Pa esnan cu a pensa cu ta aceptabel pa laga bo sushi na Boca Catalina! Seguramente bo a trece esaki cu bo na beach, dus con a para cu bo por a hiba nan back cu bo, laga solamente bo footprints siguiente biaha,” e usuario a publica hunto cu e potretnan di e sushi acumula y un potret di e sitio limpi despues cu nan a recoge e desperdicio.

E publicacion a ricibi hopi atencion y comentario di turista como di localnan cu a gradici e ciudadanonan pa nan bon acto y alabes tabata disgusta y asombra pa e comportamento di e personanan cu a simplemente laga nan sushi benta na un caminda publico.

“Danki pa haci e sushedad ey limpi. E ta asombroso cuanto falta di respet hende tin”; “Esaki ta vies y inaceptabel. Mi no ta kere e personanan ey stima Aruba. E ta un lastima y berguensa. Danki pa recoge e sushi”; “Danki pa haci’e limpi. Mi djis no ta compronde kico algun persona ta pensa,” ta algun di e comentarionan cu e publicacion a ricibi.

Aruba Tourism Atuhority (ATA) tambe a tuma nota di e publicacion y a comenta: “Danki. Boso ta un ehempel pa tur e bishitantenan di e isla. Boso gesto sigur ta laga e isla miho di loke e tabata. Nos ta agradecido pa bo contribucion pa nos bunita isla.”

Publicacion manera esaki ta comun riba rednan social y ta subraya e problematica grandi cu Aruba tin cu loke ta desperdicio.

Aña pasa TPEF y Serlimar a firma un acuerdo pa pone 100 bari di sushi na e costa di Aruba. E barinan a wordo ubica strategicamente for di Arashi te cu Baby Beach. A pesar di esaki, e problema di desperdicio ta persisti y un motibo grandi pa esaki ta cu e barinan di sushi aki ta yena hopi lihe y no tin otro bari di sushi den cercania pa hende benta nan desperdicio afo.

Esaki claro no ta un excuus pa laga e desperdicio simplemente benta na camindanan publico, pero teniendo na cuenta e crecemento di turismo, ta un bon momento pa gobierno, TPEF y Serlimar revisa e posibilidad pa aumenta e cantidad di barinan cu tin poni na e costa di e isla.