Hende muher ta progresa… O homber ta bay atras…?

Awe riba Dia Internacional di Hende Muher ta supone cu prensa ta bisa un que otro encuanto celebracion di e dia aki. E aña aki no por tin e eventonan grandi, bunita y bon atendi cu nos conoce di e añanan anterior. Tur cos cu por tuma lugar ta na distancia, cu e bentaha adicional cu e gastonan ta hopi menos. Asina sikiera por spaar e gastonan di un sala cu centenares di hende cu ta bin scucha, celebra y come. Anualmente por tin un par di discurso cu ta realmente destaca banda di retorica obligatorio, pero ta dificil pa midi e efecto cu nan tin den bida real di resto di aña. Nos ta partidario pues pa no organiza nada mas? Absolutamente cu no, e tin su valor como lugar di encuentro pa un grupo substancial di hende muher pa siña di otro, discuti y talvez keda cu algun bon intencion pa nan trabao durante aña. Sigur cu si ta reduci gasto kedando digital tambe ora cu Covid-19 mengua, lo ta bon pa continua.

Tin señalnan positivo pa menciona den ultimo añanan, unda por mira cu den ambos sector, publico y priva, hende muher ta logra penetra mas den e circulonan mas halto di gerencia. Esaki ta bon, pero nos no mester gaña nos mes. Mester tuma na cuenta cu un porcentahe considerable di e hobennan masculino no ta logra caba nan estudio na nivel di Bachelor o Master, cu e resultado cu e proporcion di hende muher cu ta competi pa e mihor puestonan a crece considerablemente. Esey ta implica cu nos ta kere den un tipo di ‘promotion by default’? Nos no sa, enberdad manera por lesa den un di e entrevistanan den e edicion aki relaciona cu e tema aki, tin poco investigacion haci riba e tipo di desaroyo aki y ta riesgoso pa saca conclusion a base di impresion, nada mas. En todo caso, e fayo den crea un carera exitoso di hopi di nos hende hombernan no ta nada pa aplaudi; di tur manera e ta un perdida pa e comunidad den su totalidad y pa e persona mes tambe, cu mester busca otro rumbo pa su carera, cu di repente ta mustra menos ‘profesional’ tambe. Di tur manera lo ta bon si algun dia nos ta mira persona di ambos sexo ta competi profesionalmente, sin cu nan genero ta un criterio. Nos no a yega ey ainda.

Sin embargo esaki, con cos ta den top di carera profesional, no ta e unico ni mas importante punto di medicion pa por haya un vista si realmente cos ta cambia den sentido positivo pa posicion di hende muher en general. Hopi mas importante ta e medicion di avance entre e diezmiles di hende muher cu no ta pertenece na e grupo privilegia pa loke ta educacion y posicion socio-economico, pero sigur ta representa un termometro importante pa evalua unda nos sociedad ta bayendo. Nos por constata cu, sin duda algun, e aña cu a transcuri hopi hende muher tabata parti di e golpi economico cu nos pais a haya. Hende muher ta mas di 50% di nos poblacion, y esey ta conta tambe pa esnan den e categoria mas humilde di entrada. Esnan cu ta haci e trabao di menos prestigio den practicamente tur sector y cu pa un parti considerable a keda na merced di ayudo alimentario, cu poco speranza di por haya empleo atrobe. Y esaki ta mas grave ainda pasobra un gran parti di e mayornan soltero no ta hende homber, sino hende muher, cu mester wak awor ta con nan ta pone pan riba mesa, nan so…

Esaki ta haci e tarea di mehora condicion di bida en general mas pronto posible esun mas prioritario, pa cualkier gobierno. Nos por keda mustra riba e exito incidental di un persona cu, a pesar di tur adversidad, ta logra studia na nivel halto y crea un carera impresionante, pero como sociedad nos mester ta mas orienta riba e totalidad: kico ta e condicionnan general pa cualkier hoben por avanza den bida. Y ta aki unda nos ta topa nos desafionan grandi. Nos no ta logra avanza cu un proporcion cada vez mayor di nos hobennan cu ta logra yega na educacion superior y gradua tambe, al contrario. Ademas, exito den educacion superior ta djis un faceta di educacion cu ta importante pa un comunidad y un economia; nos mester di e tecniconan cu ta percura pa economia ta move: e mecanico, e specialista di airco, e administrador financiero na nivel medio, etc. No ta tur hende ta bay universidad, esnan cu no tin e interes ey, no mester di e ruta ey. Pero no por ta asina cu nos ta scoge pa hopi di nan, inconscientemente, ofreciendo un educacion basico asina deficiente cu hopi ta keda pega na un nivel unda no tin opcion. Oportunidad pa scoge ta existi solamente ora bo ta yega na unda bo por scoge, no si e sistema a saca bo caba di e porta patras.

Riba Dia Internacional di Hende Muher, nos ta contempla e avancenan modesto, pero ta mira mas cu tur cos e retonan cu a keda, no pa hende muher avanza so, sino tambe pa e hende homber no sigui cay atras. Esey no ta na beneficio di ningun di nos.