‘E simpel echo cu mi a asumi e posicion aki den pais Aruba ta ilustra cu hende muhe por haci tur cos mescos cu hende homber’, prome minister Evelyn Wever-Croes (MEP) ta conta Bon Dia Aruba na ceremonia di huramentacion di Arumil diahuebs pasa. Esaki relaciona cu intencionnan pa laga hende muhe drenta milicia Arubano.

Siman pasa un total di 13 militar Arubano a hura di nan propio cuenta pa asina sigui extende nan compromiso cu e trabou di ta militar. E ceremonianan aki ta tuma luga ora e militarnan cu drenta den Arumil completa nan educacion bou auspicio di e organisacion militar Arubano. Pues ta asina cu Timon van Dishoeck, comandante di Marinierskazerne na Savaneta ta conta Bon Dia con nan lo ripiti e ceremonia den par di luna mirando cu tin militarnan cu ta ocupa cu nan training y estudio.

Segun e comandante ora un persona hura of extende nan promesa na Arumil esey kiermen cu nan ta pone nan na disponibilidad di servicio di e base militar na Savaneta pa cualkier tarea, na cualkier momento.

Un ehempel di esaki ta con e ceremonia aki lo mester a tuma luga ultimo november, pero mirando cu e tempo ey tabatin un buskeda pa e baby Roshandrick cu a fayece, Arumil a drenta den accion y a pospone e ceremonia te awo.

Mirando cu Arumil tin nan porta habri pa forma hobennan cu dificultad social, sr. van Dishoeck ta splica cu e programa aki ta importante aunke tin personanan cu no ta caba e estudio. “Nos kier enfoca riba personanan cu ta duna nan compromiso pa sigui un estudio y carera militar.”

Prome luitenant di Arumil ta conta Bon Dia cu e training cu Arumil ta bay den dje ta hopi intensivo mirando cu ta dura 9 luna y te hasta ta spera di nan cu nan mes ta duna les. “Nos ta curasha hende pa drenta Arumil via nos promocionnan regular tambe. Nos sa bisa gaynan cu tin e parti fisico hopi bon pero cu no tin bon conocemento di Hulandes pa tuma un curso y nan ta bon bini cerca nos.”

Pa loke ta trata e formacion social, prome luitenant a expresa cu nan tin opcion pa sigui den Arumil ora por mustra cu nan compromiso ta sigui na un nivel halto. “Nos ta mira cu tin hende cu en berdad ta cay afo pero nos ta keda riba e punto cu ta depende riba cada persona si nan kier keda na e nivel cu nos a pone nan of si nan kier bay bek na unda nan tabata prome.”

Opcionnan pa drenta den gobierno
Prome minister a expresa cu den cuadro di cooperacion den Reino e hobennan cu lo sigui un trayecto di maximo 4 aña na Arumil por bin na remarke pa drenta departamentonan di gobierno cu ta encera siguridad ora esaki keda regla.

“Nos mester mas hende pa yuda nos den siguridad. Pero tambe pa ora nan caba nan trayectorio aki nan experiencia no bay perdi si nan sali di aki pa bay traha den horeca of otro sector no relaciona. Tur hende cu experiencia den combatimento di criminalidad nos mester.”

E prome stap pa yega na un areglo asina a keda concretisa na e ceremonia unda un hoben cu a haya reconocimento special pa su aporte den militar a haya un decreto di reino (koninklijk besluit) por medio di gobernador Alfonso Boekhoudt pa asina e hoben por sigui den rango di siguridad.

Hende muhe posiblemente drentando Arumil tambe
Mirando cu Hulanda a haci posibel pa hende muhe tambe por forma parti di Marinier, prome minister Evelyn Wever-Croes tin plania pa haci mescos cu Arumil.

Prome minister a sigui conta con mirando cu ta luna di hende muhe esaki ta un bon momento pa cuminsa na cambia esaki. Alabes mirando cu minister di defensa di Reino Ank Bijleveld (kende tambe ta hende muhe) ta yega Aruba e siman aki e mandatario ta spera cu por delibera riba esaki ampliamente. Esaki pasobra hunto e dos mandatarionan ta responsabel pa Marinierskazerne.

“Nos ta kere cu en berdad e ta e momento pa hende muhe tambe por participa cu proyectonan aki y p’esey nos lo ta mirando kico tur mester haci pa realis’e. Tur e aspecto organisatorio nos tin cu regla ainda.”

Di parti di sr. van Dishoeck no tin niun problema si gobierno kier laga hende muhe drenta milicia Arubano. “E ta envolve entre otro trece instructornan hende muhe y crea un luga separa pa nan drumi. Pero nos no tin problema. Si Aruba ta dicidi esaki nos lo haci nos miho pa ehecut’e.”