Nan a bisa e muhe na Merca cu e tin suerte e no ta un hende muhe na Santo Domingo, nan a bisa esun na Santo Domingo cu e tin suerte e no ta un hende muhe na Lebanon, nan a bisa esun na Lebanon cu e tin suerte e no ta un muhe na Saudi Arabia y ami
ta cuestiona si algun dia, nos lo djis tin suerte di ta un hende muhe sin importa unda nos ta.
Mi hendenan, Hulanda ta di luto y bo feminista preferi tambe pasobra cada biaha un hende muhe muri na man di violencia, nos tur ta perde algo. Pa esunnan cu ta biba den nubia y no ta sigui noticia internacional. Ta asina cu un hoben di 25 aña yama Anne Faber a perde na Hulanda un dos siman pasa, el a bay un fietstocht y nunca mas el a bin bek. El a disparce di Amsterdamsestraatweg cual por cierto ta e caya unda mi ta biba. Despues di un buskeda hopi intenso, nan a haya su bais y tas. Mas despues nan a haya algun pista di hende, nan a garaun sospechoso y despues e miedo mas grandi a wordo confirma.
Nan a haya Faber su curpa un caminda na Zeewolde cual ta mas o menos un ora leu di Amsterdamsestraatweg. Un fayo huridico podise? Esun cu a comete e crimen tabata un sex offender cu den pasado a abusa dos mucha muhe violentamente y tabata den rehabilitacion. Pakico un hende cu un record criminal asina grandi ta den rehabilitacion
y no bon cera den un prizon ta un otro pregunta. Pero wak e consecuencianan. Anne
djis kier a bay core su bais y nunca mas el a bin bek. Poco luna pasa mi tambe a cuminsa
core mi bais, mi ta kere mi a conta boso tur, pero hopi lihe mi a realisa cu mi long trips
riba mi bais posiblemente no tabata un opcion mucho sigur y mi a stop. Mi tabata gusta
e cuenta di core bais leu di ciudad, pasobra ta asina druk y mi tabata haya anshamento. E
berdad ta cu desde tempo mi a bin biba na Amsterdamsestraatweg e caya a duna mi the
creeps. Pero mirando con duro e ta pa haya algo pa biba aden na Utrecht, mi a keda. Un
biaha mi a keda na mi amiga su cas te laat y mi a bay cas bek rond di 2or di madruga riba bais. E tabata e prome y e ultimo biaha cu mi a haci e joke ey, simplemente pasobra mi notabata gusta e sentimento di ta asina laat mi so y tabata tin mucho homber ta cana rond na e oranan ey tambe.
Tur esaki ta djis contexto, djis yenando pagina, un caso tristo mas, pero esaki ta e realidad. Nos hende muhe ta vulnerabel na violencia y maltrato unda cu nos ta. Cu bo ta na Saudi Arabia of cu bo ta Hulanda cu supuestamente ta un di e paisnan mas feminista na mundo, semper bo ta den peliger simplemente pasobra bo ta muhe. Cu bo bay Aruba vakantie, bo ta den peliger pasobra bo ta un hende muhe. E caso di Anne a mira un final, esun di Natalee ainda ta buscando di dje. Ta un muhe riba e mundo aki kiermen biba den un estado di paranoia. E kiermen wanta bo yabinan duro den bo man ora bo ta canando bay cas anochi boso. Tin ora e ta cana te skip bo cas, pasobra bo tras tabata tin un grupo di homber ta cana y bo tin miedo nan lo drenta bo tras. Pues bo ta keda cana te ora nan disparce pasobra bo no kier nan sa unda bo ta biba. Ta un hende muhe riba e mundo ki ta biba cu miedo, ta subi un taxi anochi y resa cu e taxista no ta psycho cu na cualkier momento por pasa bo un man y intimida bo pasobra bo ta bo so den auto cu ne.
E ta hiba un amiga cu bo baño semper, na tur evento grandi just in case algo mester
pasa. Muhenan, nos ta haci tur sorto di cos pa nos propio siguridad. Desde e buddy system, na wak kico nos ta bisti, na comporta nos mes netjes, keda cas etc. Pero nada di esey ta salba nos, pasobra nos ta wordo mira como obheto pa mundo henter. Pasobra bida di un hende muhe den e mundo aki, simplemente no ta bal mesun hopi cu esun di hende homber y nos mester yena delaster un rekisito pa por wordo considera un bon muhe. E siman aki nan a haya Anne, e no tabata e prome, e no lo ta e ultimo. Podise algun dia, nos hende muhe lo ta liber di violencia y maltrato na man di hende homber, mi no ta perde e speransa ey. Mi hendenan, stima e hende muhenan den bo bida, trata nan cu dignidad y respet. No pasobra nan ta bo familiar, sino simplemente pasobra nan ta humano den un mundo cu ta haci tur cos pa deshumanisa nan.
