Pa haya un miho bista con atractivo hendenan muhe hoben na Corsou y Hulanda ta haya nan mes, a haci un investigacion comparativo na Corsou y Hulanda. Hunto cu esaki a wak tambe si e evaluacion tocante nan propio atraccion ta relaciona cu e grado den cua hendenan muhe ta haci foutnan den pensamento. E prome resultadonan ta mustra cu muhe Curasoleño ta haya na mes mas atractivo cu hende muhe Hulandes.
Foutnan den pensamento ta maneranan di pensa cu ta deforma e realidad. Ehempelnan di foutnan den pensamento ta pensa blanco-preto (algu ta bon o robes, bunita o mahos), pensa negativo (ora di contratiempo grandi o chikito spera lo peor mesora) y keda fiha solamente riba e caracteristicanan negativo di su mes.
E sorto di foutnan aki den pensamento no ta saludabel: nan ta ocasiona kehonan psikico, manera depresion y miedo. Foutnan den pensamento ta ocasiona tambe cu hendenan ta bira malcontento cu nan curpa o ta desaroya un trastorno den comemento. Pa e motibo ey ta importante por lo tanto pa investiga ki rol e foutnan den pensamento aki ta hunga den e grado cu hendenan muhe Curasoleño y Hulandes ta haya nan mas atractivo.
E resultadonan di investigacion ta haci posibel pa desaroya intervencionnan pa preveni kehonan psikico cu tin di haber cu curpa, manera grado abou di satisfaccion di curpa y/o trastorno den comemento manera bolimia o anorexia.
E investigacion actual a keda haci door di dr. Pieternel Dijkstra (NCOI University), dr. Dick Barelds (Rijksuniversiteit Groningen) y dr. Odette van Brummen-Girigori (Universidad di Corsou Dr. Moises da Costa Gomez). A participa na e investigacion 160 hende muhe hoben di Corsou y 152 hende muhe hoben di Hulanda.
E resultadonan a mustra cu hende muhe Curasoleño ta haya nan mes basta mas atractivo cu hende muhe Hulandes. Ademas, hende muhe Curasoleño ta haci hopi menos foutnan den pensamento cu esunnan Hulandes y riba 5 di e 10 foutnan den pensamento investiga hende muhe Curasoleño a score mas abou cu esunnan Hulandes.
Asina hende muhe Curasoleño tin hopi menos e inclinacion di keda fiha riba e caracteristicanan negativo cu muhe Hulandes. Bou di hende muhe Hulandes a resulta cu foutnan den pensamento tin relacion ademas hopi mas fuerte cu con atractivo e hende muhe ta sinti su mes.
Bou di hende muhe di Corsou esaki casi no ta e caso. E resultadonan ta implica cu hende muhe na Corsou ta mas contento cu su mes: nan ta haya nan mes mas atractivo y tin menos molester di foutnan den pensamento. Si toch nan tin esaki, ainda nan por haya nan mes atractivo. Na Hulanda esaki ta completamente otro. Con e diferencianan entre hende muhe Curasoleño y Hulandes por keda aclara/splica precisamente, no ta completamente cla. Probablemente hende muhe na Corsou tin un imagen ideal menos realistico ora ta trata nan aparencia cu hende muhe Hulandes.
E resultadonan di investigacion entretanto a keda publica den e revista cientifico International Journal of Cognitive Therapy (General Cognitive Distortions and Body Satisfaction: Findings from The Netherlands and Curaçao). E investigacion ta continuacion di un investigacion anterior tocante e imagen di curpa di hende muhe Curasoleño y Hulandes cu a keda publica den e revista Sex Roles (Weight-Influenced Self-Esteem, Body Comparisons and Body Satisfaction: Findings among Women from The Netherlands and Curaçao).
Por ultimo, no por keda sin menciona cu e investigado principal, dr. Pieternel Dijkstra, den cooperacion cu Facultad General di Universidad di Corsou Dr. Moises da Costa Gomez y Centro di Guia Educacional (SIGE) ta organisa na UoC un simposio titula: Motivatie stimuleren bij jongeren riba 27, 28 y 29 di september 2017.
