Rudy Leysner di Fundacion Movemento ta Bida

Un persona activo ta un parti importante di un estilo di bida saludabel na tur edad. Pero mientras un persona ta bira mas bieu, su musculonan ta bira mas debil, nan ta sinti mas dolor y nan tin posibilidad pa cay y pa haya lesionnan.

Varios estudio a revela hopi aspecto di e proceso di envehecimento, manera e dificultad pa haci movecion. Cuminsa un programa di ehercicio tambe ta un bon idea pa mehora calidad di bida y tene un persona den un ambiente mas social.

Durante un entrevista cu Bon Dia Aruba a haci cu Rudy Leysner, presidente di  Fundacion Movimiento ta Bida, y cu Azriah Palm cu ta boluntario di e fundacion, nan a splica con nan a cuminsa cu e idea di crea programanan di movecion pa hende grandi na Aruba.

Rudy Leysner a duna di conoce cu el a traha 30 aña pa gobierno, y tin hopi conocemento den e tereno di recreacion y deporte; e tabata director di e departamento di ‘Sports For All’ y for di eynan a cuminsa e parti di canamento pa haci hende mas consciente di canamento y su importancia, e parti di actividad fisico en general.

Despues cu el a sali di su trabao pa motibo di pension, el a comenta cu el a dicidi di dedica su mes na haci algo pa comunidad. Asina el a cuminsa dedica atencion na e gruponan cu ta mas den necesidad, manera el a expresa “ e grupo cu ta hopi lubida” specificamente e grupo di hende grandi di mas di 50 aña y 60 aña.

Leysner a bisa cu nan a crea varios actividad den diferente bario di Aruba, cada aña nan ta promove dia 16 di april cu ta Dia Mundial di Actividad Fisico desde 8 aña pasa, nan ta afilia na e Red di Actividad Fisico di America (RAFAPAN) y Rudy Leysner ta miembro ehecutivo.

A traves di esey e fundacion a adkiri mas conocemento di actividad fisico, y di investigacion. El a expresa cu e dia ey ta e dia cu “nos mester bira mas consciente di nos salud”. Nan ta promove esaki bisando cu “ehercicio ta un remedi.”

Leysner ta conta cu e actividad cu nan ta haci pa diferente bario cu hende grandi a duna basta conocemento di con por traha cu hende grandi y tambe e parti social. E programa ta consisti di 12 siman parti den 3 ciclo di aña, dunando oportunidad dos biaha pa siman cu actividad fisico cu terapista specialisa, parti social, bailoterapia y tambe e parti di lectura of otro actividad cu ta concerni envehecimento activo.

Den e parti aki, el a expresa cu nan a siña hopi den e aspecto ey; e programa ta traha hunto cu boluntario, e fundacion ta duna e guia na nan y actualmente nan por cuminsa traha nan mes.

El a sigura tambe cu nan a haya peticion di otro bario pa haci e programa pa hende grandi, pero e fundacion no tin e fondonan pa haci esey, pa motibo cu nan a haya fondonan di Samenwerkende Fondsen di Hulanda pa 3 aña so; despues di esey e programa ta termina y nan como fundacion mester busca fondo pa sostene e fundacion.

Segun Leysner, tur e miembro y boluntarionan di e fundacion ta haci trabao cu amor y pasion “mi ta kere cu e  ta un necesidad masha grandi mes pa hende grandi.” Tambe cu “hende grandi ta asisti na e programanan cu hopi motivacion y alegria, pa motibo cu nan ta busca algo pa haci.”

Un proyecto cu e fundacion tin pa otro aña yama “Bida Activo ta Bida Largo” unda nan lo bay celebra dia mundial di actividad fisico. “Mientras mas bo ta inverti den bo estilo di bida, mas lo bo haya un miho calidad di bida mañan.” Tambe nan lo bay haci Bailoterapia y Yoga den Centro di Bario di Noord.

Tambe nan lo bay sigui cu e ‘Caminata den Naturalesa”, pa motibo cu tin hende ta gusta cana pa conoce Aruba y su naturalesa.  “Nos hendenan ta bin pa cana un poco mas lihe pero tambe tin hende cu ta cana mas slow y nan ta wak e bunitesa di Aruba.” E fundacion ta organisa e caminatanan na Parke Arikok, Bushiribana y Ayo Rock Formation. “For di esey nos a ripara cu hopi hende di Aruba no conoce nan propio pais.”

El a comenta cu pa otro aña e fundacion lo bay asisti na e reunion di RAFAPANA na Mexico, na september, y tambe nan lo kier haci dos curso pa certifica e profesionalnan cu ta traha den salud. E curso ey ta consisti di haci actividad fisico prome cu e persona bay tuma medicamento pa un malesa cronico, pa nan por wak con e persona por recupera.  “Si bo por duna nan un actividad fisico durante un periodo di 3 luna pa nan haci tur dia, bo ta bay weita cu bo ta bay baha sucu, presion, tur cos.” Si esey no ta funciona nan lo recomenda e persona pa haci un combinacion di ehercicio y remedi.

E otro curso lo trata ‘Prevencion di Caida’; esaki pa motibo cu e ta un problema grandi mundialmente. Ora e persona yega cierto edad hende sa cay kibra heup, y di ey nan por keda drumi; esey nan lo kier preveni cu e ehercicionan.

Rudy Leysner a splica cu “ hende grandi mester di un espacio na Aruba, un lugar cu nan por bay pa recrea, pa haci diferente actividad.”

Pa finalisa el a sigura cu hende mester keda activo pa resto di nan bida, asina e persona por gosa mas di su behes; hopi hende ta yega cierto edad y nan ta kere cu esey ta e final, mientras cu na e momento ey nan mester gosa nan bida.