Ayera mainta a tuma luga e evento Bazaar organisa pa Club Kibrahacha 60+. Unda entre otro ta keda curasha hende grandi pa keda den movecion.
E evento tabata yen di personanan di tur generacion cu a bin como famia pa disfruta di e ambiente na Club Kibrahacha 60+. Tabatin bandanan cu a toca durante e dia, asina animando e hende grandi y hobennan pa baila.
Tabata tin un mercado habri pa hende por cumpra paña, arte traha pa hende grandi durante tayer na Club Kibrahacha 60+, cuminda y cos di bebe y te hasta tabatin matanan na benta.
E club manera nos a yega di splica par di siman pasa, ta ocupa su mes cu mantene hende grandi activo. Esaki ta entre otro pa nan haci ehercicio, keda creativo y te hasta haya tayer con pa anda cu hermentnan digital.
Curasha hende grandi pa keda den movecion
Pa elabora mas riba e ehercicio cu hende grandi ta haya den e club nos a papia cu Rudy Wong, kende ta un boluntario na e club. Sr. Wong ta yuda hende grandi pa coregi nan postura uzando diferente ehercicio. “Hopi hende grandi su musculonan ta bay atras despues di tempo si nan no wordo uza. P’esey ta importante pa keda den movecion. Nos ta haci ehercicio pa reforsa nan musculonan tanto como nan wesonan.”
Sr. Wong a expresa cu hopi hende grandi ta keda sinta sin haci movecion pa un gran parti di dia, pues Club Kibrahacha 60+ ta motiva hende grandi pa mantene nan mes activo.
E mes ta un persona cu a dedica su mes na deporte pa hopi aña. E ta conta nos cu el a bira campeon di Taekwondo 5 biaha na Hulanda y 1 biaha na nivel Europeo. “Pues ora mi a bin Aruba bek, mi a lanta algun scol di Taekwondo y mi a coach tambe. Na Kibrahacha mi ta purba transmiti mi conocemento pa esunnan cu tin mester di dje”.
‘Mi perspectiva di hende grandi a cambia’
Un otro boluntario cu a yuda na e evento specificamente, ta Jonovan Wernet. Sr. Wernet ta un hoben cu ta atende Colegio EPI y ta un miembro di Circle K di Colegio EPI. E ta conta Bon Dia cu el a wordo puntra pa su docente si e lo kier traha como boluntario na Kibrahacha un aña pasa. E experiencia tabata uno bastante inspirado, segun sr. Wernet. Specificamente pasobra el a cambia e perspectiva di hende grandi.
“Bo mentalidad di hende bieu ta cambia pasobra bo ta pensa cu nan ta fragil pero awe mi a wak par di hende grandi cu a baila mas cu mi y te hasta traha mas duro cu mi. Nan ta hopi balente y mi ta admira esey di nan.”
