Dialuna ultimo durante un conferencia di prensa di Gobierno di Aruba y Crisis Team, a trece dilanti cu den dianan aki a cuminsa haya pashentnan afecta cu Covid-19 di edad mas avansa compara cu e casonan di dos siman pasa, cu e mayoria tabata trata di personanan hoben.
Tambe Cuerpo di Polis a afirma cu lo wordo adapta e maneho pa loke ta trata barnan y nigthclub debi na aumento di casonan.
Sharline Koolman di DVG a papia tocante e personanan cu despues di dos siman ta birando malo pa via di e prome casonan cu tabata trata di esunnan mas hoben. Koolman a trece dilanti cu por ta e wela, e ruman of e mama cu ta wordo infecta y cu e virus lo keda durante un tempo largo den e mesun cas.
Pa evita esaki el a enfatisa cu e cuarentena ta sumamente importante, e tendencia tabata cu den prome siman no por a mira hopi caso den hospital pero aworaki e situacion ta cambia pa esunnan cu ta cay den e grupo di riesgo.
Tambe a wordo informa cu te dialuna tabatin 3 persona den unidad di cuidado intensivo (ICU) 2 di nan mester di yudansa pa hala rosea, lo cual nan ta pronostica cu pa otro siman tin un aumento di casonan.
Ademas, el a menciona cu na e momento cu frontera a wordo habri tabata di espera cu e virus lo drenta na isla pero e comportacion di e ciudadanonan no a yuda hopi.
Pa cu esaki, Halto Comisario di Polis Vanessa Tjon Kock a informa cu e cantidad di hende den barnan y sitionan nocturno no a baha, el a declara cu controlnan di polis ta tumando luga y esey a trece algun discrepancia pa loke ta trata e permiso cu algun luganan aki tin.
Tjon Kock a sigura cu tur e luganan tin su permisonan legal pero na e momentonan aki e isla ta den crisis y aworaki tin cu traha cu un decreto ministerial, door di esaki tambe ta bay tin adaptacion pa loke ta trata con e maneho ta wordo describi den decreto ministerial pa asina por ta mas reconocibel pa cuerpo policial y doñonan di establecimento pa nan compronde den kico nan tin cu mantene nan mes.
