Dia 7 y 8 di december venidero na Piedra Plat Entertainment Center ta bay tin un seminario/congreso unda cu sindicato STA conhuntamente cu oradornan cu lo ta presente, lo delibera riba diferente topiconan. Entre otro riba con e orario di trabao di hende ta conecta cu desaroyo social y hopi mas.

“Nos a haya e necesidad aki pasobra mirando e situacion cu pais Aruba ta aden, nos mester cambia e rumbo. Nos ta bisa nos ta bibando den un pais Democratico. Pero nos ta realmente reconoce Democracia den locual ta wordo practica aki na Aruba,” asina Diego de Cuba a declara ayera na prensa.

Den e seminario aki lo wordo papia riba diferente tema; pensioen, situacion economico di Aruba, cu diferente experto cu lo cubri e areanan crucial aki. Tur cos ta prepara caba pa e dos dianan informativo aki. “No tin problema pa drecha locual cu na caminda a daña. Mi ta kere cu si tin boluntad, tin probabilidad pero bo mester wordo guia den esey. Y esey ta un parti hopi importante den e seminario aki,” sr. de Cuba a bisa. El a sigui comenta riba e parti di debe cu hopi famia ta enfrenta na Aruba cu ta pone bo cay den un abismo cu ta dificil pa sali for di dje. E seminario aki ta sumamente importante cu e meta di informa e delegadonan cu ayudo di specialistanan y expertonan pa subraya tur e problemanan aki cu ta pasando den nos comunidad segun e sindicato a trece dilanti.

‘E trahado merece miho’
Sindicato Sta ta enfatisa cu e trahado na Aruba merece miho anto tin hopi cos cu mester wordo cambia. Pues e seminario aki ta primordialmente manera nos a trece dilanti pa informa nan delegadonan di e situacion di pais Aruba cual segun sr. de Cuba no ta uno facil. “Nos ta den un situacion basta fastioso,” e ta expresa.

“E clase trahado ta esun cu ta duna su aporte hopi grandi den e comunidad aki, y nos kier mira un cambio grandi tambe,” e ta bisa. Un di e cambionan cu e sindicato a vocifera di basta tempo mes caba ta cu nan kier rebaha e cantidad di oranan cu hende ta traha pa siman. E idea ta pa tur hende cu ta traha riba di 40 ora pa siman considera e extra oranan ey como overtime. Nan kier esaki den tur sector. “Nos a ripara cu tin companianan ainda unda bo ta traha 48 ora pa siman, 6 dia pa siman, tin hasta ta bay 55 ora pa siman. Ki bida social bo por tin si bo ta trahando asina hopi? Y nos a mira e consecuencianan di esaki tambe.”

Sr. de Cuba a enfatisa cu el a yega di expresa esaki hopi tempo pasa caba cu e lo bira un problema hopi serio pa pais Aruba.

Cambio den ley
No ta un secreto cu comercio ta riba un liña na momentonan aki di tanto peso cu nan tin di cosnan pa paga, impuesto, invoerrechten, unda cu trecemento di mercancia ta cada biaha keda bira mas caro. Aña pasa Bon Dia a combersa cu varios comerciante paden y pafo di Caya Betico Croes cu tin diferente negoshi, pero a conta e mesun storia aki. Sindicato STA ta propone pa baha cantidad di ora di trahado cual nan ta bisa lo ta practicamente yudando e gobierno. “Pasobra esey ta bay genera mas cupo di trabao. Por ehempel, nos ta awor negoshando cu Alhambra Casino caminda nos kier bay baha e orarionan di trabao. E dianan di trabao so cu lo baha di seis pa cinco, lo bay genera 37 cupo di trabao,” segun sr. de Cuba.

E sindicato ta bisa cu tin cierto luga cu bo ta traha awendia shete dia pa siman mes, ta e compania mester bay wak di su mes con e ta bay regla esaki. “Pasobra e cos aki tin cu wordo cambia den ley. Ki bida social un persona lo tin cu ta traha tanto ora asina,” sr. de Cuba a enfatisa. E lema ultimamente ta cu e parti social riba nos isla ta total lost, anto esey e sindicato a expresa ayera atrobe. Nan ta haya cu esey ta nan deber como sindicato pa cuminsa trece e cambionan necesario pa cambia pensamento tambe di e gobernantenan.

‘Empresarionan mester sa con pa maneha e situacion’
Pues si baha cantidad di ora y dia, ta crea mas cupo di trabao. Pero esaki por nifica atrobe – na banda di comercio – cu lo aumenta e gasto di e doño di trabao pa kisas tuma mas hende den servicio. Sr. de Cuba a bolbe enfatisa cu “E empresario mester sa con lo mester maneha cu e situacion. Nos a mira hopi leynan laboral wordo cambia. Si mi bisa bo cu e trahadonan a beneficia di esaki, ta dificil,” sr. de Cuba a bisa.

Un persona cu por ehempel tin un solo dia di descanso di su trabao, e no por haci nada riba e dia aki. Muchanan ta keda cu otro hendenan y mas cosnan ta sigui escala unda cu problemanan social ta bati nos mata segun sr. de Cuba a expresa. “Berdaderamente e ta bay bira un dolor di cabes pa e doñonan di trabao. Pero nan lo mester sa con pa maneha e luga cu e cantidad di personal cu nan tin of si nan lo mester tuma mas hende. Pasobra bo kier keda gana placa riba e trahado, pero si bo no por maneha e negoshi e ora bo mester stop cu e negoshi. Aki na Aruba nos no por continua asina ki,” sr. de Cuba a bisa.