For di diferente fuente Bon Dia Aruba a haya e informacion cu den cuadro di ehecucion di e Plan di Crisis Social, gobierno a contrata varios persona bao di un contrato como suministrador di servicio, y no como empleado bao di un contrato laboral.

E convenio cu a cera yama ‘Dienstverleningsovereenkomst’ abrevia na ‘DVO’. Nos redaccion no a logra haya sa unda tin persona ta traha bao di e condicion aki y di cuanto persona ta trata. En todo caso tin un grupo contrata di e forma aki na departamento di Asunto Social.

E diferencia legal ta cu bao di e tipo di convenio aki no ta considera e persona un empleado, loke tin algun implicacion importante. E persona bao di e contrato aki no ta haya un salario, cu e deduccion di loonbelasting, AZV, AOV, etc. E ta haya al contrario un suma completo y di su parti e mes ta responsable pa paga e obligacionnan legal aki. Basicamente por bisa cu e persona ta loke nan ta yama na Hulanda un ‘ZZP-er’ (Zelfstandige Zonder Personeel), un fenomeno cu a crece hopi den ultimo añanan.

Den termino di Aruba nos ta papiando di un persona cu tin un negoshi chikito, sin personal, y como tal lo mester registra un ‘eenmanszaak’ na Camara di Comercio. No ta conoci ainda si e proceso ey ta tumando lugar caba.

DVO y CAft.
E escogencia pa e tipo di contrato aki tin otro implicacion y esey ta cu e convenionan aki ta haci cu no ta registra esakinan bao di e capitulo di Gasto di Personal, sino bao di ‘Bienes & Servicio’ loke ta haci cu estrictamente mira, nan no ta gasto di personal mas.

Esaki por bay trece complicacion den e comunicacion cu e organo di supervision CAft, cu tabatin un debate bastante fuerte cu gobierno di Aruba riba e punto aki. Esey tabata concerni e pregunta si e gastonan di personal bao di e Plan di Crisis mester bay hunto cu e gastonan di personal regular di gobierno. Esaki en vista di e discusion tocante e limite pa gasto di personal, cu pa 2020 ta keda stipula na Afl. 476 miyon. Finalmente e acuerdo tabata cu e gastonan di e Plan di Crisis lo ta inclui den esaki, es decir cu gobierno a perde e bataya ey.

Cu e ultimo alternativa aki di no duna e trahadornan temporal bao di e Plan un contrato laboral normal, aunke tambe temporal, a habri e posibilidad pa no administra e gastonan aki como gasto di personal.

Como cu CAft tabata na Aruba ayera, redaccion di Bon Dia Aruba a haci uso di e ocasion pa puntra CAft si nan ta na altura di e opcion aki cu gobierno a tuma, y si acaso esaki ta algo palabra cu CAft. Presidente Gradus di CAft tabata categorico den su contesta cu esaki no a discuti cu gobierno y tampoco acorda. Tambe el a expresa cu di tur manera e gastonan aki ta di considera como gasto di personal.

Den e contexto aki tambe a haci pregunta tocante e suma di Afl. 476 miyon pa gasto di personal di gobierno di Aruba, cu ta abarca solamente e gasto di personal di e ministerionan y no ta inclui ni e gastonan di Staten, Rekenkamer, Raad van Advies y DOW. Tampoco e gastonan di e fundacionnan subsidia cu ta compromiso fiho di gobierno. Di e manera ey pa 2019 Raad van Advies, cu ta sigui e normanan internacional di calcula gasto di personal, a yega na calcula esaki na Afl. 735 miyon , loke tabata mas di 50% di e presupuesto total. Prof. Gradus a confirma cu e idea ta en berdad pa cuminsa papia cu gobierno di e totalidad di gasto di personal, defini di e manera aki.