Heidi Klum ta rechasando acusacionnan cu el a bula den avion priva di Jeffrey Epstein.
Den weekend, documentonan di un caso di difamacion entrega pa Virgia Roberts (awo Virginia Giuffre) contra Ghislaine Maxwell a ser habri pa un hues federal. Den e documentonan, Giuffre a acusa Klum di ta un di e celebridadnan di perfil halto cu a bula den avion di Epstein.
Un di e documentonan revela tabata di un deposicion na 2011 den cual Giuffre a bisa un abogado, cu entre e personanan cu a biaha den e avion di Epstein tabata ‘Naomi Campbell, Heidi Klum, Bill Clinton y Al Gore’, segun WPEC.
Un abogado pa Klum a bisa People cu acusacion di Giuffre ta ‘totalmente falso’.
“Cualkier referencia na Heidi Klum den conexion cu Jeffrey Epstein ta totalmente falso. Nomber y inicial di Heidi Klum ta ausente di tur documento di vuelo cu a revela. Hopi hende di perfil halto ta riba e lista, pero no Klum”, e abogado a bisa, agregando cu “E splicacion ta simpel. E nunca tabata riba niun di e avionnan di Epstein. Y esey pasobra e no tabata conoce Epstein y nunca tabata riba su isla.”
Den un declaracion, Klum di 47 aña di edad a bisa: “Mi ta mirando noticia y ta mira cu pa eror a nombra mi como pasahero di un vuelo di Epstein. Mi no tabata conoce Epstein y pues nunca tabata riba su avion, na su cas of na su isla. Mi ta papiando pasobra mi no kier ta asocia eroneamente cu Epstein y e storia horibel rond di dje.”
E detayenan nobo a yega un dia despues cu hues Loretta Preska a duna veredicto pa habri e documentonan. E caso civil, cual a resolve na 2017, tabata involucra acusacion di Giuffre cu Epstein a abusa di dje tempo cu e tabata menor di edad.
