Secretario general di organisacion di Estado Mericano, Luis Almagro, a haci un yamado diamars pa implementa e carta democratico inter- Americano y asina suspende Venezuela di e organisacion regional OEA, si e pais no ta realisa eleccion general awor.
Den un documento di 75 pagina, e ex-canciyer di Uruguay a bisa cu gestion diplomatico “no a duna ningun resultado den e proceso”. Almagro a bisa cu tur intento di dialogo a fracasa, y cu pueblo Venezolano a perde fe den su gobierno y den proceso democratico.” E carta ta un version actualisa di su informe critico riba Venezuela. E carta ta esun mas reciente di Almagro y ta mustra su impaciencia cu e deterioro institucional y e situacion economico agudisa na Venezuela.
“E señal berdadero cu a logra haya di nobo e caminda institucional di banda di Venezuela ta si su autoridadnan ta realisa un proceso di eleccion den proximo 30 dia, hunto cu liberacion di preso politico, y duna un balor nobo na tur ley cu a ser anula na e pais aki,” Almagro a splica. El a solicita pa renoba e poder electoral y magistrado di corte supremo tambe.
Venezuela a acusa secretario general di OEA, Luis Almagro, di promove un intervencion internacional, despues cu e diplomatico a sugeri e suspension di Venezuela for di e organismo, si nan no ta planifica eleccion general inmediatamente. “Almagro, ta un enemigo conoci di pueblo di Venezuela. El a crea suposicion falso encuanto Venezuela, cu o bhetivo di busca un intervencion internacional na Venezuela y asina aumenta e guera economico”, canciyeria di Venezuela a bisa diamars den un comunicado.
