E hefe negociador di gobierno Colombiano den e dialogo cu e organisacion guerillero Eln, Juan Camilo Restrepo, a anuncia ayera den entrevista cu Caracol Radio cu el a solicita presidente Juan Manuel Santos pa relev’e di su cargo na mesa di negociacion.
“En lo personal mi ta considera cu mi ciclo na cabes di e ekipo negociador cu Eln ta cerando,” el a informa.
Restrepo a argumenta cu e causa di su renuncia ta debi na su rol den e Tribunal dI Arbitramento, cu ta radica na Camara di Comercio Internacional na Paris, y den cual e ta asumi e rol di presidente.
“E tribunal aki ta bay tin un intensificacion den su trabaonan importante den prome trimester di e aña, igualmente otro serie di compromiso y responsabilidad di caracter personal y profesional lo exigi di mi cu mi ta cu mas permanencia na Bogota, desde e prome trimester di proximo aña,” el a señala.
“Tur esey mi a consulta cu presidente di Republica, y na ken mi a solicita por lo tanto pa libera mi di e responsabilidadnan como hefe di e ekipo negociador, loke lo ta efectivo den prome dianan di e aña entrante,” el a declara.
Y el a agrega cu e hefe negociador nobo lo ta esun cu ta asumi e proximo ciclo di dialogo pa “no tin ningun problema di continuidad,” pa cual e luna aki e lo ta trahando cu un comision di transicion.
Te na e momento aki, presidente Santos no a haci ningun pronunciamento encuanto e renuncia di Restrepo.
