(AP)—E secretario-general di e Organisacion di Nacionnan Uni António Guterres a urgi ayera pa nacionnan rico honra nan compromiso pa yuda e paisnan pober combati cambio di clima den un discurso pa e parlamento di Lesotho y a ripiti su sperando cu Africa lo pronto tin asientanan permanente riba e Conseho di Seguridad di ONU.
Guterres ta riba un bishita di tres dia pa e region sur di Africa y tabata na Sur Africa diaranson. Su biahe di dos dia pa Lesotho, un reino montañoso, tambe lo mir’e bishita Katse Dam, un parti integral di e plannan di e pais pa cultiva su reservanan di awa.
Un enfoke di Guterres su bishita ta e placa cu nacionnan pober den Africa y otro caminda mester pa combati e impacto di un planeta calientando. Mientras Africa ta contribui un cantidad chikito na calientamento global, e ta un di e continentenan mas afecta.
Paisnan a adopta un acuerdo durante e discusionnan climatico di ONU na Azerbaijan luna pasa pa inyecta al menos 300 biyon dollar pa aña pa yuda nacionnan den desaroyo maneha calentamento global. Esaki tabata hopi menos cu e mas di 1 triyon cu e paisnan aki tabata pidi p’e.
“Paisnan desaroya mester cumpli cu nan compromisonan…cumpli cu e promesa di 300 biyon dollar anualmente pa financiamento climatico, Guterres a conta legisladornan di Lesotho. “Paisnan cera y paisnan menos desaroya manera boso ta specialmente vulnerable.”
Tambe el a bisa cu e Loss and Damage Fund cu a ser crea pa compensa paisnan pober pa desasternan natural causa pa cambio di clima “mester ser operacionalisa rapidamente y funda generosamente pa esnan cu ta responsable pa destruccion climatico.”
E parti sur di Africa ta experenciando un di su pio securanan, causando un crisis di hamber cu a afecta mas cu 27 miyon hende, segun ONU. Lesotho ta un di e varios pais pa declara desasternan natural pa via di e efectonan devastador di e secura riba cosechanan.
E secura a ser culpa riba e fenomeno natural El Niño, pero otro crisisnan manera brotenan mortal di colera y inundacionnan den e region di este Africa a ser atribui na cambio di clima.
Un rapport e aña aki pa e Organisacion Meteorologico Mundial a bisa cu nacionnan Africano ta perdiendo te cu cinco porciento di nan GDP tur aña y ta cargando un peso mas pisa compara cu otronan pa via di cambio di clima.
Guterres a bisa na Sur Africa diaranson cu e ta spera cu Africa lo tin al menos dos miembro permanente den e Conseho di Seguridad pa ora su termino caba na december 2026, aunke e ta reconoce cu esaki lo ta dificil. Na Lesotho, el a bisa cu e tabata un otro “inhusticia” contra Africa cu un continente di mas cu 1.4 biyon hende ainda no tin representacion permanente riba e organismo ey.
“Ora un continente cu ta hogar di casi un kinto di humanidad ta keda sistematicamente exclui for di asuntonan global, nos mester yama esaki kico e ta, un marca di colonialismo cu no tin espacio den mundo awendia,” Guterres a bisa.
