NASA ta poniendo un red carpet na Stacion Espacial Internacional (ISS) pa Tom Cruise graba un pelicula den espacio.
Administrador di e agencia espacial, Jim Bridenstine a bisa prome cu e lansamento planea ayera di dos astronauta di NASA abordo di un raket di SpaceX cu compania di Elon Musk ya ta hayando cliente cla pa despega.
Cruise ta un di nan.
Bridenstine a bisa cu e lo lag’e na Cruise y SpaceX pa duna detaye di e mision. “Mi lo bisa bo esaki: NASA ta den combersacion cu Tom Cruise, y claro, su team, y nos lo haci tur den nos poder pa hacie un mision exitoso, incluyendo habri Stacion Espacial Internacional”, el a bisa AP.
Contestando tocante Cruise filmando abordo di ISS, Musk a bisa CBS This Morning: “En berdad, mi ta kere mester warda pa wak. Nos ta dunando sosten y mi ta kere NASA ta dunando sosten na tur loke lo capta imaginacion di publico.”
Bridenstine a bisa cu henter e motibo pakico NASA a crea ‘e mercado comercial aki’ ta pa SpaceX, Boeing y otro compania priva por atrae clientenan otro cu gobierno Mericano. Esey lo reduci costo pa pueblo Mericano, el a bisa, y aumenta acceso na espacio pa tur sorto di hende – incluyendo celebridad.
“Mi no lo reconoce esaki hopi… pero mi tabata inspira pa bira un piloto di Navy pasobra na momento cu mi tabata den scol basico, mi a mira e pelicula Top Gun”, Bridenstine, di 44 aña di edad, a bisa.
Cruise a actua como piloto di Navy, Pete ‘Maverick’ Mitchell den e pelicula na 1986. E aña aki tin programa un secuela. “E pregunta ta, ‘Tom Cruise por haci un pelicula nobo cu ta inspira e Elon Musk di proximo generacion’. Y si e por, e ora ey nos ta duna sosten. NASA ta completamente aden”, Bridenstine a bisa.
