(AP) – Hefe di Nacionnan Uni a adverti na un reunion di nivel halto di Nacionnan Uni diamars cu e situacion cu ta keda bira pio y esaki ta trece dilanti e riesgo di plama mirando cu e tension ta menasa di bira inmenso.
Secretario-General Antonio Guterres a haci un yamado pa un paro di tiro humanitario inmediato pa asina por hiba cuminda, awa, medicina y gasolin cu ta desesperadamente necesario. El a apela pa “aleha for di e limite prome cu e violencia bay cu mas bida y plama hopi mas ainda.” Guterres a expresa na e reunion mensual unda a trata e conflicto di decadanan largo entre Israel y Palestina cu mester obedece cierto reglanan di guera. Tambe el a expresa cu e sufrimento di e personanan di Palestina no por hustifica e “actonan hororoso di teror cu a tuma luga dia 7 di october” di parti di Hamas na Israel y a exigi e libertad di e personanan secuestra. Sinembargo, a enfatisa tambe cu “e atakenan aki no por hustifica e castigo colectivo di henter e pueblo di Palestina.”
El a expresa preocupacion profundo na e “violacionnan cla di leynan internacional humanitario,” yamando Israel su bombardeo constante di Gaza y e nivel di destruccion y mortonan civil “alarmante.” Proteha e personanan civil ta “di sumo importancia den conflicto arma.”
Sin nombra Hamas, e hefe di Nacionnan Uni a enfatisa cu “proteha e ciudadanonan nunca por nifica usa nan como un escudo humano.” Guterres a critica Israel sin nombra esaki, bisando cu “proteha e ciudadanonan no ta nifica ordena miyones di persona evacua bay parti nort, unda no tin shelter, cuminda, medicina ni gasolin y sigui bombardia e parti sur.”
Merca ta pushando pa adopta un resolucion cu lo condena e atakenan di Hamas na Israel y violencia contra civilnan ademas di reafirma Israel su derecho pa defende su mes. Tambe tabatin expectativa cu lo vota riba esaki riba diamars sinembargo e diplomaticonan a bisa cu te ainda ta negociando esaki.
