(AP) – Nacionnan Uni su oficial top di derechonan humano a expresa preocupacion diamars tocante detencionnan arbitrario y “uso desproporciona” di forsa na Venezuela mientras forsanan di seguridad ta sigui tuma accion despues di e pais su eleccion presidencial.
Forsanan leal na President Nicolas Maduro a tuma accion contra mas di 2,000 persona pa manifestacion den su contra of a causa di pone duda riba su declaracion cu el a gana un tercer termino den e eleccion di dia 28 di juli apesar di evidencia fuerte cu el a perde e eleccion.
“E ta specialmente preocupante cu asina hopi persona ta ser deteni, acusa of procesa sea cu incitacion di odio of bao legislacion di contraterorismo,” Nacionnan Uni su Alto Comisario pa Derechonan humano Volker turk a bisa den un declaracion. “Ley criminal nunca mester keda usa pa limita e derechonan na libertad di expresion, asamblea pacifico y asociacion.”
Turk su comentarionan ta bini mientras Venezuela su oposicion ta prepara pa un manifestacion cu lo tuma luga diasabra cu tin speransa di aumenta presion riba Maduro pa reconoce derota y negocia un transicion politico.
“Si maduro haci un evaluacion realistico di su opcionnan, e lo compronde cu su metodo actual no ta sostenibel,” lider di oposicion Maria Corina Machado a bisa reproteronan diamars.
Machado, ken anteriormente a nomina diplomatico Edmundo Gonzalez como su reemplaso ora el a keda prohibi di participa den e careda, a papia cu reporteronan na un conferencia di prensa virtual for di un localidad no revela a causa di preocupacionnan di seguridad. Den su comentarionan, el a purba di calma e expectativa di resolucion rapido na e crisis politico aki.
“Ningun hende sa con hopi e lo tarda, pero sin duda tin dianan doloroso nos dilanti,” Machado a comenta,
E oficina di derechonan humano di Nacionnan Uni a bisa cu den mayoria caso cu el a documenta, e detenidonan no a ser permiti asigna abogado di nan scogencia ni tampoco tin contacto cu nan famia. “Algun di e casonan aki lo crea desaparicion,” el a bisa.
Turk a haci yamado pa e “liberacion inmediato di tur hende cu a ser deteni arbitrariamente, y pa un huicio husto ser duna na tur detenido.” El a agrega cu e “uso desproporciona” di violencia pa autoridadnan y e atakenan riba e manifestacionnan pa individuonan arma bogando pa e gobierno, algun resultando den mortonan, no mester keda ripiti.
