Siman aki, durante un conferencia di prensa den cual tabata presente minister di Asunto Economico, Comunicacion y Desaroyo Sostenible, Geoffrey Wever; director di Departamento di Asunto Economico, Maria Dijkhoff-Pita; Humphrey Vrolijk di Departamento di Asunto Economico; Rene van Nes, hefe di delegacion di Union Europeo, a elabora riba proyectonan di Union Europeo pa Aruba.

Minister Wever a indica cu ademas di trece informacion tocante e proyectonan di Union Europeo pa Aruba, tabata kier a introduci Sr. Rene van Nes tambe, kende ta e hefe di delegacion di Union Europeo staciona na Guyana, y pues e representante di UE pa nos islanan. Sr. van Nes a inicia su periodo di 4 aña na Guyana na september 2022 y esaki ta su prome bishita na e islanan Hulandes, incluyendo Aruba. Segun Wever, Van Nes “a bin comparti cu nos e pensamento di Union Europeo, y scucha di e progreso di nos proyectonan. Y nos ta kere ta importante pa, mirando e bon relacion cu Aruba tin cu UE, pa duna pueblo un tiki mas claridad riba e proyectonan, y asina trece mas visibilidad di e proyectonan cu ta wordo financia cu fondonan di Union Europeo.”

Durante su bishita Sr. van Nes a reuni cu Minister President, Sra. Evelyna Wever-Croes y minister Geoffrey Wever d pa intercambia di ideanan y revisa algun proyecto andando. Tambe lo revisa futuro proyectonan cual ta wordo financia door di Union Europeo. Un combersacion hopi ameno unda cu di ambos banda ta enfatisa e colaboracion entre Aruba y e delegacion y Union Europeo. Tambe a usa e oportunidad pa combersa riba e planificacion di e fondonan nobo cu Aruba lo ricibi pa e programa di e-Government cu Gobierno di Aruba ta preparando. Van Nes a bisa cu e meta di e-Government ta pa trece gobierno mas cerca di pueblo di un manera electronico, pa servicionan di gobierno bira mas accesible pa pueblo. E ta convenci cu henter pueblo lo beneficia di esaki y lo experiencia esaki como algo positivo.

Actualmente e facultad nobo di STEM na Universidad di Aruba (SISSTEM) ta wordo financia door di Union Europeo. Esaki, entre otro, ta e proyecto di mas grandi actualmente tumando luga cu ta ser financia pa UE. Segun Wever, e proyecto aki ta hopi importante y tin varios aña den preparacion. Aña pasa, despues di un proceso largo a haci e groundbreaking y awo construccion ta andando y ta bayendo segun plan. “E ta un proyecto hopi importante pa e economia di conocemento na Aruba, caminda cu nos por ofrece nos studiantenan un facultad diferente cu oportunidadnan nobo. Nos ta spera cu e lo tin impacto positivo den e sentido cu por atrae studiantenan di afo cu ta bin studia na Aruba.” A indica cu esaki no lo ta posible sin e fondonan di UE.

Van Nes a bisa cu SISTEM – Sustainable Island Solutions Through Science, Mathematics, Engineering – ta e uso di tecnologia y conocemento pa sigura cu ta alcansa un desaroyo sostenible. El a elogia gobierno di Aruba pa duna amplitud na e proyecto aki pa asina sigura sostenibilidad na Aruba, y cu e ta spera cu ta bay haci e proyecto aki conhuntamente cu Universidad Catolico na Leuven, Belgica y UNDP, y cu Aruba por wordo mira como un lider den area di desaroyo sostenible y sostenibilidad.

Durante su estadia na Aruba Sr. Van Nes lo bishita Universidad di Aruba y e area di renobacion di Maria Convent y por a observa e avancenan den e renobacion.

Sr. Van Nes tambe lo bishita algun proyecto mas chikito manera e proyectonan di RESEMBID cual tambe ta ser financia via di e fondonan Europeo regional cu ta entre otro ‘Turning the Tide’, ‘Aruba’s Public Safety and Multi-Hazard Early Warning System’ (EWS) y ‘Validation of replicable methods for coastal ecosystem monitoring’.

Sr. van Nes tambe lo haci un bishita na Parke Arikok pa cual den pasado a wordo financia door di Union Europeo.

Minister Wever a enfatisa cu Aruba “mester ta hopi contento cu nos ta den un constelacion caminda tin un relacion estrecho cu Union Europeo” cu nan ta dispuesto pa financia proyectonan importante pa nos pais, y pues pa e motibo aki a introduci Sr. Van Nes na comunidad.

Di su banda, Van Nes a bisa cu e colaboracion entre UE y Aruba ta sinta riba e reconocemento norma y balor comun, un colaboracion cu ta bay decadas atras, y cu ta duna cada bes fruto mas grandi. El a bisa cu Union Europeo mester ta orguyoso di por contribui na e desaroyo di Aruba.

El a menciona cu apart di e dos proyecto grandi – SISTEM y eGovernment – den cual UE ta duna colaboracion y financiamento, ta inclui agricultura, seguridad di cuminda, y Erasmus, cual ta un proyecto di intercambio di estudiante entre Europa y Aruba.