Hefe cientifico di NASA: ‘Cerca di haya bida na Mars, pero mundo no ta cla pa e descubrimento’

E proximo mision di NASA na Mars lo ta su mas avansa te cu awo. Pero si cientificonan descubri cu tabatin bida – of tin bida – riba e Planeta Cora, publico lo por acepta un concepto extraterestre asina?

Hefe cientifico di NASA, Jim Green, no ta kere. “Lo ta revolucionario”, el a bisa the Telegraph. “E lo cuminsa un manera completamente nobo di pensa. Mi no ta kere nos ta cla pa e resultadonan. Nos no ta.”

E Mars 2020 rover di e agencia, prepara pa lansamento berano proximo, lo ta e prome pa colecta muestra di material Marsiano y manda esaki bek na Tera. Pero si cienfiticonan descubri biosignaturanan di bida den superficie di Mars, e hallazgo lo sacudi astrobiologia, segun Green, director di e division di ciencia planetario na NASA.

E Mars 2020 rover, hunto cu e ExoMars rover di Agencia Espacial Europeo, lo bora den e superficie di Mars. Ta kere cu e superficie di e Planeta Cora ta radioactivo, pues si tin bida, probablemente e ta bou di superficie. “Nos nunca a bora asina profundo”, Green a bisa. “Ora e ambiente bira extremo, bida ta bay den e piedranan.”

E idea a keda proba den nos planeta: Despues di bora kilometer den Tera, investigadonan a haya mas bida bou superficie di Tera cu riba dje, el a bisa. “E ‘bottom line’ ta, unda tin awa, tin bida.”

Y si e rovernan di e agencianan haya prueba cu tabatin awa na Mars, el a bisa, e confirmacion lo bin algun siman of luna despues di aterisahe – es decir, prepara boso.

Proximo mision na Mars.
E Mars 2020 rover di NASA lo lansa na juli 2020 y aterisa den e crater Jezero di Planeta Cora na februari 2021. Mars ta 140 miyon di miya for di Tera. E ta ekipa cu dos camara HD y un helicopter pa saca potret aereo di e crater, cueba y sero di e planeta.

E meta principal di e mision ta pa busca señal di bida. E rover lo busca ambientenan habitable den pasado, haya biosignatura den piedra, y lo test e muestranan aki bek na Tera.

Pero si e cientificonan no logra haya evidencia di bida, esey no lo ta e fin di exploracion humano. Mars 2020 lo test produccion di oxigeno den e planeta y monitor clima Marsiano pa evalua con colonianan humano potencial lo por biba riba Mars.