Hechonan iregular treci pa dilanti relaciona cu resultado di eleccion di reina di Carnaval

Weekend cu pasa ultimo, dianan 21 y 22 di januari a tuma luga eleccionnan di reina di Aruba su Carnaval 69. No ta prome biaha cu despues di eleccion di reina, y den otro festival- y eleccionnan, hopi hende, di un grupo specifico of di personanan cu tabata apoya un reina, no ta keda contento y ta expresa esaki ariba diferente medio.

Esaki tabata e caso tambe e aña aki despues di e weekend di eleccionnan di reina, specificamente pa loke ta trata resultado den e categoria hubenil. Den e caso aki, wela y mama di reina hubenil di Oranjestad y Champagne Carnival Group, Elsa Krosendijk y Arianne Westerburger, cu a sali prome finalista, a expone den e programa di radio Ivo for Life algun hecho cu no a bay bon, cu no tabata etico, durante e anochi di eleccion mes.

Un di e prome cos cu Krosendijk a menciona cu ta algo cu no mester a pasa ta cu e edad pa por competi den categoria hubenil a cambia y esaki sucede sin mucho informacion ni mucho tempo di anticipacion. Pa añanan e edad pa reina hubenil tabata 13-16 aña, pero e aña aki SMAC a tuma e decision di cambia esaki di te cu 17 aña.

Seguridad no tabata na altura, den camerino, e candidata di Oranjestad y Champagne tabata e unico cu no tabatin drape dilanti su espacio pa cambia paña, hendenana grandi a papia di “kibra” e candidata en cuestion y hopi mas palabra mahos y malicia, a sali na cla contra e candidata aki specificamente.

El a sigui splica cu e tabatin problema cu hurado, den e sentido cu a baha un hurado for di e plataforma di hurado, pa motibo cu supuestamente e tabata amiga di Westerburger. Ambos Westerburger y Krosendijk a indica cu esaki no ta e caso, no ta e hurado ta e amiga di Westerburger, sino su ruman.

Siguiente hecho cu a trece pa dilanti ta e scoringsheet y e diferencia di puntuacion. Segun Krosendijk y Westerburger ta splica, e diferencia di puntuacion, y e manera con cierto huradonan a vota, a demostra un iregularidad den e puntuacion.

Krosendijk y Westerburger a enfatisa cu treciendo e hechonan aki pa dilanti nan no ta reclama corona, pero mas bien kier trece na luz tur e cosnan malo, iregularidadnan y malicia cu ta sucede, aña aden y aña afo, durante eleccionnan di reina.