Pa mira tur documento relevante click aki

Heberto Gamero Contin ta otro di e inversionistanan afecta di Acqua Condominium cu awor a bira Radisson Blu y tambe a tuma contacto cu Bon Dia Aruba pa trece dilanti su mal contento, preocupacion y punto di bista tocante e desaroyo di e proyecto aki na unda cu su persona ta un di e poco cu a firma e “adendum.”

Gamero ta un empresario, escritor y creador di cuento exitoso Venezolano cu a gana varios premio na Venezuela door di su habilidad pa skirbi. Na 2009 ora e tabatin 56 aña su persona hunto cu su casa a dicidi di inverti tur loke nan a spaar den hopi aña di trabao y pa locual nan tabatin hopi ilusion di biba un temporada di vakantie na e One Happy Island.

Nan tabata kier huur dos di nan apartamento y un so tabata pa nan disfruta di dje, na 2013, supuestamente ora mester a construi nan tur y mester a keda cla.

Pa problemanan di “mercado”, manera Gamero a sigura den su declaracion, na 2015 un desaroyador nobo, Sr. Venancio Gonzalez a cumpra e proyecto na unda ya caba tabatin 52 apartamento bendi di un total di 208. Un aña despues nan a cuminsa realisa reformanan pa e luga por bira un hotel.

Na september di 2019 e desaroyador a firma un contract cu e cadena di hotel Radisson Blu pa opera e edificio sin notifica ni pidi autorisacion na e propietarionan di e apartamentonan cu tabata bendi caba. Minister Dangui Oduber como minister di Turismo tabata presente den e celebracion aki.

Na december 2020 nan a informa e inversionistanan – como Gamero, Bianchi, Matteo y Potenza, kendenan Bon Dia Aruba a entrevista caba den edicionnan anterior – mediante un carta firma pa e abogado na e momento ey y ken awor ta minister di Economia, Comunicacion y Desaroyo Sostenibel, mr. Geoffrey Wever.

Den e carta aki tabata bisa cu nan lo a disolve e hunta di condominio inicial, e division di parcelanan, cu nan mester a cancela e renobacionnan realisa y si nan no tabata di acuerdo cu e solicitud aki, nan tabatin e opcion di pidi nan placa back, kiermen loke nan a paga na 2009.

Na april di aña 2021, hotel Radisson Blu a habri su portanan. Gamero y su casa consciente di e permisonan di habitabilidad cu a wordo concedi, a dicidi di bin Aruba cu e intencion di firma e documentonan di propiedad. Pero esey no tabata posibel, segun Gamero a afirma; e desaroyador a nenga di firma esaki debi cu nan no tabata acepta pa firma loke e desaroyador tabata solicita.

Gamero y su casa a keda tres luna na Aruba na unda cu nan a dicidi di bay sin e documento di propiedad.

Na october di 2021 nan a haya e famoso y definitivo “adendum”, un documento igual cu esun cu nan a haya na 2020 pero mas formal. Gamero y su casa, cansa di warda asina tanto tempo pa firma y haya nan apartamentonan, a dicidi di firma e adendum aki aceptando e condicionnan cu e hotel tabata impone, como por ehemplo: huur e apartamentonan na e desaroyador so na unda nan mester a pone tur mueblenan igual cu e hotel, sin fiha e porcentahe di huur cu Gamero mester haya cu esaki.

“Nos tambe a acepta e transferencia na e desaroyador di e parcelanan di e pool, casa club y parcelanan lateral na unda lo a construi dos edificio similar na esun cu a bende nan. Tur esaki na cambio di derechonan di uso permanente y negociabel. Di e forma aki nos por a bende of huur e unidadnan sin problema algun, den esey nos tabata confia,” Gamero a sigura.

Na februari di 2022 nan a haya e porcentahenan y condicionnan definitivo di Radisson Blu cu tabata 57% pa e hotel y 43% pa e propietarionan. Gastonan di condominio cu tambe e propietario tin cu paga, mueblenan cu ta supera un cifra di 40.000 dollar y varios reparacionnan cu a wordo haci.

“Nos ta sinti cu nan ta burla di nos. Nos a firma e adendum di manera obliga y contract di compra-benta. Nos tabata den man di operador di e hotel na unda un hala di e-mail a wordo manda sin cu nos por haya contesta,” el a bisa.

Despues di un aña di esaki te ainda dos apartamento no a wordo bendi, ni un di e apartamentonan a wordo bendi y tampoco ta un opcion pa huur nan, manera Gamero ta splica.

“Nos no tin duda cu e condicionnan na fabor di e hotel ta e culminacion di un gañamento cu a wordo planifica pa añanan, a pesar di tur cos nos ta confia cu e na e One Happy Island ta bay haci husticia cu nos cu ta esnan cu a haci impulso e proyecto di Acqua Condominium Aruba, esaki no ta bay ta facil pero nos ta bay sigui den e lucha” el a finalisa.

Manera a informa par di dia pasa den otro edicionnan di Bon Dia Aruba, tin aproximadamente 30 inversionista cu a cumpra diferente apartamento den e proyecto aki for di 2008 y 2009. Te e fecha aki nan no por a logra haya nan propiedad pa diferente motibonan, cu ni e hotel ni autoridadnan concerni incluyendo minister di Turismo Dangui Oduber, ainda no ta bin dilanti pa splica kico ta bay sucede cu e cantidad grandi di placa cu e personanan aki a inverti den e proyecto.

Potret di minister Dangui Oduber hunto cu Venancio Gonzalez pertenece na e website 24ora.com