Heart-Centered Leadership Foundation ta un fundacion cu su trabao ta enfoca den yuda e hoben- y hobennan adulto den diferente area y aspecto di nan bida. Siouxsie Kock. fundador y director di e fundacion ta conta di e mision, vision y meta di e fundacion y e trabaonan cu e fundacion ta eherce.

Kock a splica cu e fundacion a wordo lanta na aña 2008, pero e prome actividad, cual tabata un seminario, a tuma luga na 2012. Desde 2014 e fundacion a cuminsa draai manera un organisacion cu su empleadonan pa asina nan por ehecuta un proyecto grandi di Hulanda cu a dura for di 2014 te cu 2019.

El a sigui splica cu durante cinco aña cu Hulanda a subsidia e fundacion pa traha riba un proyecto di school drop outs y despues cu nan a caba cu esey nan a sigui cu sociaal crisis plan, pero na mesun momento nan a pidi subsidio na Hulanda pa otro proyectonan y e subsidio mas grandi cu e fundacion ta ricibi ta fondonan for di Hulanda pa nan traha cu hoben.

Pa loke ta e vision di e fundacion, Kock a remarca cu nan vision ta pa crea hendenan cu ta mas resiliente, cu ta para firme den nan sapato y cu nan ta desaroya tur nan potencial.

“Nan ta hendenan para firme y tin norma- y balornan halto. Cu e vision ey nos kier wak si Aruba na dado momento tin hendenan cu ta tuma decisionnan corecto. E por ta mayornan, e por ta docentenan, e por ta polis e por ta abo como persona mes. Nos ta enfoca basta riba e persona y nos ta yama e liderazgo personal pa asina cu nada no ta stroba bo di bay dilanti,” el a resalta.

E mision di e fundacion ta pa cumpli cu e manera cu nan ta bay traha pa asina nan por yega na hendenan cu ta cla pa lidera nan bida.

“Loke nos ta haci cu nos trabao ta eigenlijk haci impacto positivo den bida di sobre todo hobennan, y ora cu papia di hoben ta di 12 pa 30 aña eigenlijk,” el a agrega.

Kock a indica cu e manera con nan ta haci esaki ta a traves di seminario, tayer, training y asina di hopi manera nan ta purba influencia e bida di e hobennan di manera positivo. El a splica cu tin tres manera cu ta haci esaki, door di duna tayer, liderazgo personal y tambe riba liderazgo profesional.

Otro manera cu nan ta usa pa involucra e hobennan ta door di duna nan sesionnan unda cu nan por papia tocante kico tin nan ocupa, kico ta bay bon, den nan bida, na scol of den comunidad, kico ta bay menos bon y kico ta e solucionnan cu nan kier mira. Y ora nan ta ocupa cu esey, Kock a señala, nan mes ta bin cu proyectonan cu nan mes kier desaroya.

Loke e fundacion kier haci tambe ta empodera e hobennan pa nan tin nan mesun voz, den sentido cu nan no ta para warda wak ki cambio ta bay bin, pero cu nan tambe por cuminsa, door di cuminsa cu nan mes, pero tambe door di bin cu cambionan chikito y door di desaroya proyectonan cu ta factible pa nan.

Papiando di e proyectonan, Kock a conta cu na 2021 nan a cuminsa traha cu otro fundacion na Merca cu ta duna un programa cu ta basa ariba liderazgo personal, comunicacion, con un persona ta conecta cu su mes y conecta cu otro. E fundacion tabata traha hopi cu e scolnan y cu e docentenan y poco poco nan a ripara cu nan tin cu haci mas pafo di scol.

El a agrega cu nan a ripara tambe door cu nan no ta ricibi hopi subsidio, nan cu traha cu boluntarionan, teniendo den mente e pensamento tambe cu si nan kier wak cambionan na Aruba nan so no por carga e vision.

“Nos kier eigenlijk pa tur hende cu tin contact cu hoben, cu ta traha cu hoben pa nos por coach nan y train nan con pa anda cu esaki. Tin mas empatia, scucha nan, no husga, sea humilde, tur e balornan cu ta cay bao e Heart Centered Work,” Kock a enfatisa.

Tambe den 2021 e fundacion a mira cu nan mester cuminsa recluta hobennan adulto, 18 aña bay ariba pa nan yuda ora cu e fundacion ta bay scolnan of ora cu nan tin seminario of training na nan ta esun cu ta guia e grupo.

Kock a splica cu e hobennan adulto ta bay ta getrain den con pa guia e grupo, con pa haci pregunta, con pa scucha y pa no duna opinion personal pasobra locual e fundacion keier ta pa e hobennan sali for di nan zona di comfrot pa nan cuminsa papia cerca nan ariba kico ta pasando of kico nan ta pensa.

E fundacion tambe tin e grupo di hoben di 13 pa 17 aña cu na momento cu nan experiencia un di tayernan di e fundacion y nan kier keda, e fundacion ta sigui guia nan y nan ta haya otro tipo di training pa wak con leu nan por involucra e Heart Centered Work den nan bida.

“E manera cu nos ta traha ta, nos ta crea un espacio sigur pa nan por papia y e Heart Centered Impact Coaches ta duna nan e confiansa di haci esey,” Kock a subraya.

E aña aki e fundacion ta anuncia e di dos aña di nan proyecto ‘Curason pa Curason’ cu ta conscientisa hoben y adulto entre (13 – 29) tocante salud mental y resiliencia mental na Aruba.

E meta di e proyecto aki ta pa normalisa combersacionnan tocante salud mental unda e proceso aki por yuda ekipa hobennan cu mas conocemento y habilidad pa sostene nan resiliencia mental.

E prome aña di e proyecto a core durante aña escolar 2021 – 2022. E fundacion a colabora cu cuater scol secundario na San Nicolas unda a logra brinda tayer- y sesionnan interactivo riba tema di resiliencia mental na 225 alumno.

E proyecto ‘Curason pa Curason’ a cuminsa bek oficialmente den juni 2023 y tin planea pa sigui core te cu mei 2024. Heart Centered Leadership Foundation lo ta expandiendo nan partner cu varios scol secundario nobo y lo ta organisando tayernan pa publico. E obhetivo ta pa alcansa 350 hoben, pa asina por sigui conscientisa y yuda hobennan reconoce e importancia di salud mental y resiliencia mental.