Healthy Lifestyle Center ta un proyecto di colaboracion entre Ministerio di Salud y Departamento di Salud Publico (DVG), cual tin e mision di mehora e bienestar general di comunidad di Aruba a traves di un estilo di bida mas saludabel y activo.
Diasabra ultimo, Healthy Lifestyle Center a habri su di dos centro na Savaneta specialmente pa comunidad pariba di brug y barionan di Savaneta, pa bay bishita nan na MFA di Savaneta unda nan ta bay atende nan clientenan for di awe 15 di april, unda nan lo inscribi y lo brinda guia profesional pa cu nutricion y movecion, specialmente esnan na riesgo pa haya complicacion di salud, door di hiba un bida no saludabel. E meta ta pa guia e participante pa adapta su bida pa uno mas saludabel.
Healthy Lifestyle Center a inicia oficialmente dia 23 di februari 2023, un di e programanan mas importante di HLC ta pa ofrece servicionan di guia di nutricion y movecion riba un forma personalisa y cu ta adapta na e bida di e cliente specifico. E programa personalisa aki tin un duracion di 3 luna den cual e cliente ta haya su citanan semanalmente cu un dietista den cual e guia con pa yega na un bida mas saludabel ta sucede.
Desde inicio, HLC a haya un acogida masha grandi mes di e pueblo di Aruba. Actualmente HLC ta conta cu un total di 293 cliente activo. Durante e aña aki HLC a logra cu clientenan a baha un total di 433kg conhuntamente. Banda di guia personal HLC tambe ta ofrece otro programanan manera curso na scolnan, curso na companianan, chekeo gratis regularmente na pueblo, ehercicio mensual na unda ful comunidad por participa.
Un programa special cu HLC ta ofrece ta e programa yama “Improving Lives Together”. Esaki ta un programa cu tin un duracion di 3 luna den cual un total di 20 cliente ta participa. E programa aki ta ofrece guia di nutricion y movecion intensivo den un forma “community based”. Durante e periodo aki e clientenan ta ricibi, banda di consultanan semanalmente na HLC cu e dietistanan, tambe un programa di ehercicio cual ta encera 3 biaha pa siman na un gym na unda nan ta ricibi guia profesional con pa haci movecion na un manera safe y accesibel.
Durante aña 2024 e meta di HLC ta pa amplia su servicionan y bay den organisacionnan pa asina guia tur esnan na pia di trabao.
Di mesun manera a informa cu 17 cliente a registra caba ariba e prome dia na HLC Savaneta, pa lo cual ta invita comunidad pa registra un bida un biba mas saludabel.
Potretnan ta cortesia di Healthy Lifestyle Center su Facebook page.
