Hazaña pa recauda fondo pa Casa Cuna y Pasadia Briyo di Solo

Artista local y lider di partido Red Democratico Ricardo Croes ta bay subi Hooiberg 21 biaha como hazaña pa recauda fondo pa dos instancia. Poniendo un banda su pechi politico, e ta conta Bon Dia cu esaki ta solamente un otro oportunidad pa por yuda muchanan, cual e ta enfatisa ta e meta principal di e reto aki.

Diabierna awor 8 di september ta bay tuma luga un hazaña caminda cu Ricardo Croes ta bay purba di subi Hooiberg 21 biaha te na e top bin bek abao. Esaki lo ta entre 4’or di atardi pa 12’or di anochi. “Ta berdad,  mi ta lider di partido Red Democratico, pero no laga esey ta un obstaculo pa bo. Corda cu e causa ta pa e muchanan y e muchanan ta di nos tur. Sin worry cua partido politico bo ta gusta,” el a bisa den un video riba pagina di Facebook Partido Red Democratico.

E intencion tras di esaki ta entre otro conscientisacion riba diferente tema. “Ami mes tabata un persona como mucha cu a drumi na Casa Cuna. Tin hopi problema social na Aruba cu ta causa hopi problema den criminalidad. Pa e motibo aki mi a pensa pa haci un hazaña y dedica e cen cu nos haya pa Casa Cuna y tambe Pasadia Briyo di Solo.”

E 21 biaha cu lo subi Hooiberg ta pa representa e 21 stoel den parlamento pa conscientisa tur hende riba integridad, cu ‘cada 21 stoel mester ta integro’. Tambe otro punto di conscientisacion cu e kier subraya cu e accion aki ta e parti di prevencion di malesa y actividad fisico.

Diferente forma pa core campaña
Sr. Croes tin e reto di ocho ora pa subi Hooiberg 21 biaha, cual ta mas cu 23.000 stap den total. “Tin diferente forma di core campaña. Otro partidonan ta haci fiesta, bebemento cu comemento, parada y desordo. E aña aki nos a concentra riba social media y un di nos evento dedica pa recauda fondo na nos instancianan.”

Condicion
Sr. Croes ta conta nos cu el a bin ta train un bon rato riba Hooiberg caba pa e evento aki. “Mi a haya cu poco problema y haya mi ta descansa e musculonan pa despues cuminsa bek. Esey tabata mas o menos seis siman pasa. Mi ta sinti mi bon y no tin niun problema di salud. E siman aki e ta bay haci un par di test medico ainda pa caba di sigura pa dokternan cu tur cos ta bon. Nunca mi a subi Hooiberg 21 biaha pero mi ta conoci manera un di esunnan cu ta bin hopi akinan, mi ta cla pe.”

E ta sigui bisa: “Subi Hooiberg un biaha mes ta un hazaña pa hopi hende riba Aruba. Bini pa bo wak cu dedicacion, disciplina y perseverancia ta cosnan cu ta trece beneficio semper. Abo tin cu pone bo parti den dje y tur esakinan conhuntamente cu un bon nutricion y descanso ta pay off.”

Bao guia di Rudy Carti
Rudy Carti ta un atleta local cu a subi Hooiberg 50 biaha den 17 ora riba 8 di december 1991.  Su meta e tempo ey pa e hazaña tabata pa set un record nobo y tambe yuda Fundacion Yuda Bo Prohimo pone cuminda di Pasco riba mesa di esunnan menos fortuna. Conociendo sr. Croes manera un amigo y atleta pa basta aña, e ta bisa nos cu: “Pa mi e ta un honor pa sr. Croes acerca mi pa yud’e cu e hazaña aki.”

Sr. Carti su rol no ta solamente manera coach pa conseho riba training y nutricion, pero tambe pa forma parti di e team cu lo ta abao na Hooiberg. Lo tin masahista, dokter y hende cu ta bay conta pa asina sr. Croes concentra riba e hazaña, mientras e team aki ta yuda cu e resto. Nan a pidi un permiso pa e evento aki cual lo limita uzadonan diario di Hooiberg un poco pa siguridad. “Loke nos ta haciendo ta un oportunidad pa pueblo tambe duna algo bek en bes di sinta na banda y critica. E por ta 1 florin, e por ta dies of mas, dependiendo na bo cartera. Pero e oportunidad tey,”  sr. Carti ta bisa.

E ta curasha tur hende, atletanan y compania por ehempel unda nan coleganan na trabao por bet si sr. Croes ta bay logra of no. Ultimamente e placa recauda ta bay completamente pa e fundacionnan den cualkier manera cu kier of por haci bo donacion.