E hayazgo di e restonan di 14 persona den e prison principal di Venezuela, cera temporalmente cinco luna pasa, a reactiva ayera e e debate tocante e crisis penitenciario di e pais, entre denuncia di iregularidad y violacion di derecho humano, AFP ta señala.

E cantidad di morto haya ora tabata haci un cobamento den e instalacionnan di e prison a subi te 14, asina Fiscalia a participa ayera.

“Te na e momento aki a recupera 14 cadaver” den e Penitenciaría General de Venezuela (PGV), situa na ciudad di San Juan de Los Morros (estado Guárico, centro di e pais), Ministerio Publico a señala,  precisando cu e hayazgo a tuma lugar riba diahuebs pasa.

E investigacionnan relaciona cu e caso lo continua pa determina e causa di e mortonan, nan a clarifica.

Diabierna, minister di Asunto Penitenciario, Iris Varela, a anuncia cu nan a haya restonan humano cu “tabata coresponde na siete persona”, algun ora despues di a declara, den un prome informe, cu nan tabata pertenece na tres victima.

Riba 28 di october di aña pasa, gobierno a completa e desaloho di PGV, despues di simannan di enfrentamento entre persona interna pa e  control di e prison y denuncia tocante fayecimento pa motibo di desnutricion y ausencia di medicina.

Videonan publica riba rednan social pa detenido y nan familiarnan tabata mustra e falta di cuminda y tratamento medico enfrente di enfermedadnan manera  tuberculosis den e prison, cu lo a causa caba por lo menos dies morto.

– Tumba comun –

E ONG defensor di derecho di e presonan ‘Una Ventana a La Libertad’, a denuncia existencia den PGV di un tumba comun cu un cantidad di cadaver hopi mas grandi.

Carlos Nieto, coordinador di e organisacion no gubernamental aki, a reitera ayera cu e cantidad di morto lo por yega na cien.

“Nos reportenan ta berdaderamente confiable”, nan a declara na AFP den comunicacion telefonico.

Fiscalía, mientras tanto, a admiti di tin “denuncianan di parti di familiarnan tocante desaparicion durante e proceso di desaloho”, sin precisa cuanto.

Nieto ta calcula cu e cadavernan a keda acumula den un tumba comun den diferente incidente cu a sucede den e prison, cu tabata alberga como 9.000 preso durante e ultimo añanan.

“Sea cu ta 14, 50 o 100, nan tabata persona bao di responsabilidad di estado”, e activista a indica.

PGV ta den remodelacion como parti di un plan di gobierno pa “pacifica” e prisonnan y adecuanan na standardnan internacional. Di acuerdo cu Varela, 96 facilidad penitenciario a keda incorpora den e programa gubernamental desde juli 2011, di cual seis a keda cera.

Segun Una Ventana a la Libertad, na Venezuela tabatin como 88.000 preso na fin di aña pasa, di cual 33.000 tabata den calabozo policial den condicion di ta amontona hunto.

Diabierna pasa, un centenar di detenido den e calabozonan di polis di estado Anzoátegui,  na ciudad di Barcelona, a declara nan mes den huelga di hamber.

E ONGnan ta denuncia cu, apesar di e plan gubernamental, e prisonnan Venezolano ta scol pa crimen unda incluso e reclusonan tin piscina, pizzeria y discoteca.

Di igual manera, nan ta reporta iregularidadnan den cumplimento di castigo di parti di e “pranes” (lidernan informal entre preso).

Luna pasa, Wilmer Brizuela Vera, alias “Wilmito”, cu ta cumpli condena pa secuestro y homicidio, a keda herida den un tiroteo na un playa na Margarita.

E incidente a causa un scandal den prensa, cu a rechasa cu Brizuela tabata liber. El a ricibi un beneficio di proceso y despues di e suceso, a bolbe keda cera den prison di Tocorón. Tambe tin dencuncia di existencia di banco illegal cu ta regla transaccion financiero entre preso y nan famia y conocirnan.