UTRECHT- Hepa! Juni a yega, awo oficialmente mi countdown pa yega Aruba por cuminsa. Dos examen mas y fuera! Aña number dos a bay manera si ta nada. Tempo un ta warda ni pa mi, ni pa bo, ni pa niun hende.

Mi hendenan, den tur e fanfaria y bomboshi di bida ma lubida cu e columna aki a haci 1 aña. Un danki ta bay na Bon Dia pa duna mi un plataforma chikito pa expresa mi locura y un danki na un y tur cu fielmente ta lesa y manda mi message. Un aña largo, cuatro biaha pa luna. Ta ki tur mi a skirbi tanto asina ey? Mi kier sa mi tabata un lora den mi bida anterior. Pero bon, ban sigui.

Ta asina cu poco dia pasa mi a topa cu un articulo riba internet tocante kico hende ta papia mas di dje ora nan ta bay terapia. E autor Katherine Schafler a analisa un grupo di hende y el a saca afo cu locual hende mas ta reflexiona riba dje, specialmente ora un hende muri of bay laga nan ta e cosnan chikito cu persona tabata haci. E psycholoog ta bisa, niun hende ta yega terapia y bisa “Waw, mi ta orguyoso di mi yiu cu ta gana hopi placa y manda mi” of “Mi ta specialmente contento cu mi yiu su diploma di universidad prestigioso”. Sino mas bien nan ta bisa cosnan manera “Mi ta haya falta di tur e bomboshi cu e tabata haci ora e ta yega cas” of “Mi yiu homber su hari, mi por reconoce e hari ey unda cu ta”. E ta subraya cu aunke tin un resumen yena cu logronan ta impresionante, na final di dia ta e cosnan di mas ordinario y chikito ta haci un bida.

Cual ta algo mi ta di acuerdo cu ne. Algun dia pasa mi a bay Bijlmer cumpra un dashiki, cual ta un dje pañanan ey tipico Africano pa mi amiga. Como cu e tin menos carni cu mi a tuma un size medium. Ey kico mi hendenan, e African aunty a gewoon caba cu mi. El a wak mi di ariba te abou y bisa mi “Abo? un medium? Wel, no ta manera cu mi no mester baha man cu e croissantnan di Albert Heijn, pero den…. No, no, no que cosa! Pero bosa kico? Mi no a rabia si, mi a djis hari cu ne y bis’e cu e no ta pa mi. No ta paso e no ta molestia mi cu un hende ta comenta riba mi peso, sino pasobra pa prome biaha na Hulanda mi a experiencia algo cu tabata corda mi di cas. Luga di rabia, mi a corda cuanto biaha mi ta bay Supermarket bandi mi cas na Utrecht y nunca e cahera a bisa mi algo fuera di “prettige dag verder”, en comparacion cu esunnan na Aruba cu asina bo keda un par di dia sin bay nan ta puntra bo unda bo a keda, of ta duna bo un comentario tocante bo apariencia aunke bono a pidi pe.

Mi a hari cu e African aunty, specialmente pasobra el a haci algo cu pa mi tabata ordinario, algo mi no a ni realisa cu mi tabata haya falta di dje. Ta berdad cu locual ta haci bida extraordinario, ta hinca den cosnan ordinario. Dus bij deze, mi ta spera tur hende e siman aki pone un poco atencion na nan alrededor y haya un tiki felicidad den e cosnan chikito. Y papiando di cosnan chikito, na Bijlmer nan a cobra mi 3 euro, mensen 6 florin pa un pastechi mas chikito cu mi horea.

Boso ta kere ta cos? Anything for the culture, el a baha bon, pero mi ta pensa si ta asina cuenta ta lora ki banda, miho mi tambe cuminsa haci pa bende. Rich life, here I come.