Dokternan di cas por lo pronto lo sigui traha nan orario normal. Pero esaki no ta nifica cu nan a yega na un acuerdo cu Organo Ehecutivo di AZV. Por lo menos no ainda.
Dr. Joaquin van Trigt, presidente di Asociacion di Dokternan di Cas, HAVA, a bisa Bon Dia Aruba cu e intencion tabata pa extende e warda di fin di siman te cu Dialuna. Esaki como protesta pa e decision unilateral di AZV pa corta 11 porciento di e suma cu ta paga na dokternan di cas, y no e 5.5 porciento di reduccion cu AZV a propone. Es mas, no tabata ni dispuesto pa acepta e reduccion di 5.5 porciento, sigur no retroactivo.
AZV di su banda ta bisa cu e 11 porciento ta pa henter e aña, y a aplica e 11 porciento pa asina cumpli cu e reduccion condiciona pa Hulanda. E 11 porciento ta representativo di 5.5 porciento di reduccion, pero door cu a cuminza na mita aña, mester a corta retroactivamente.
Siman pasa Vocero di AZV Solange Tchong a bisa cu no tabata un decision di AZV pa a bin cu e cortamento di pago na dunadonan di cuido, sino e tabata un decision di Hulanda a cambio di e prestamo di likides pa Aruba. AZV ya caba tabata prepara pa reforma e seguro medico, pero unabes Covid19 a dal, y Hulanda a exigi reduccion di 35 miyon pa 2020. Gobierno a acepta e condicion y di mes AZV mester cumpli.
Sinembargo, Solange Tchong a bisa cu AZV tabata dispuesto pa sinta cu e asociacion di dokternan di cas y esaki a sucede diadomingo. A presenta un proposicion y esey ta e base di e negociacion. Ningun di e partidonan kier discuti publicamente riba e proposicion, y ta prefera di haci esaki den tur privacidad pa asina por busca forma pa yega na otro.
Mientrastanto Bon Dia Aruba a tende di otro fuente, cu AZV ya caba a scapa di gasta varios miyon florin e aña aki, door cu no a manda pacientnan pa Colombia. E pregunta ta si ta considera e hecho cu no a gasta e suma aki den e totalidad di 35 miyon cu mester reduci segun exigencia di Hulanda.
