E morto di un pacient di Covid na su cas den marduga di ayera, ta algo cu pa HAVA ta hopi di lamenta. Particularmente pasobra net ayera a anuncia un maneho nobo pa yuda esnan cu haya problema na cas.

Segun dr. Joaquin van Trigt, despues di a confronta hopi reto, a yega na un procedura nobo pa atende cu pacientnan cu Covid, cu por yama e number 166. E procedura ta un colaboracion entre dokternan di cas, Cruz Cora y Ambulance.

“Prome cu nos a yega na e areglo aki, dokternan di cas y hasta ambulance tabata bou presion constante. Dokternan di cas, pa medio di e dokter di cas na warda, tabata brinda servicio te 10’or di anochi.”

Y dokternan tabata bou presion. Falta dokter di cas, cu riba dje ta lucha cu falta di material di proteccion (PPE). “Tempo di e prome ola, a pone dokternan di cas disponibel 24 ora pa dia, y tabata trata kizas 3 pacient pa dia, incluso oranan di anochi. Pero awor, tin dokter tin como 30 pacient averahe pa dia cu ta yama, algun te hasta 50, cu tin acceso na nan telefon celular. Esaki a produci un situacion hopi fastioso.”

A avisa Gobierno y AZV di e dificultadnan di entre otro e falta di PPE y tambe e peligernan den marduga si un dokter mester bay su so na un cas. “Particularmente pa coleganan femenino, e tabata dificil pa garantisa nan siguridad.”

Como tal, HAVA a pidi un structura nobo, pasobra pa motibo di falta di finanzas, a bira imposibel pa traha 24 ora pa dia. “Y lamentablemente esey a costa bida di un persona.”

COVID-19 a mustra di ta un malesa hopi grave cu ta afecta henter comunidad y tur dunado di cuido ta haciendo e esfuerzo maximo pa brinda e mihor cuido posibel pa ciudadanonan.

P’esey mes, entrante ayera a cuminsa sistema di warda nobo. Di Dialuna pa Diabierna un dokter di cas lo ta disponibel specificamente pa casonan di emergencia di COVID durante orario di 7 or di anochi te 7 or di mainta. Den weekend e dokter di cas ta disponibel henter dia. Pa casonan di COVID di emergencia mester yama number 166. Lo tin posibilidad di evaluacion na cas door di dokter di cas na warda hunto cu personal di Rode Kruis. Ambulance lo ta standby si ta constata cu mester transporta pacient pa Hospital. “Nos ta enfatisa cu e number 166 ta pa personanan cu a test positivo pa COVID of tin sintomanan di COVID y mester di ayudo inmediato. No mester yama e linea ki pa haci test of preguntanan general. Esey ta bay regular via bo dokter di cas,” Van Trigt a bisa. “Di e forma aki nos tur ta spera di por yuda patientnan cu COVID di un forma responsabel den temponan dificil.”

Servicio lo sigui normal

Pa loke ta pacientnan regular, HAVA kier pa nan sigui tuma contacto cu nan dokter di cas, si tin otro keho. Berdad ta asina cu durante e prome ola, a tuma e paso pa duna tratamento pa medio telefonico. Pero awor sa miho con pa anda pa evita cu e virus ta plama y como tal, kier pa e pacientnan bin personalmente. “Nos ta purba mantene e cuido y accesibilidad mas tanto posibel. Berdad si ta cu cada dokter di cas ta determina su maneho. Pero tur hende, cu excepcion di esnan cu problema respiratorio por bay personalmente na e consultanan.”

Contagio extremo

HAVA ta preocupa cu e cantidad di contagio di Covid den comunidad. “Ciudadanonan mester asumi responsabilidad personal. Nan mes tin responsabilidad propio pa cuida, y esaki te awor a laga di desea. Esey ta e conexion mas debil di nos comunidad. No ta manteniendo e reglanan stricto.” HAVA ta bisa cu awor ta laat, pero kizas mester a introduci boet for di principio. “Hendenan no ta preocupa y awor kizas hasta boet ta laat.”

Berdad otro Shelter in Place of Toke de Queda mas robusto por yuda, pero HAVA ta compronde e realidad economico tambe. “Nos ta di Salud Publico y nos ta sigui duna señalnan riba e tereno aki.”

Resumiendo

Procedura di cuido pa COVID-19:

dialuna- diabierna 7:00 AM – 7:00 PM, via bo mesun dokter di cas, despues via 166

diasabra y diadomigo henter día via 166