HAVA: mil test pa dia pa pone cluster Gusto riba mapa; Testnan pa Covid19 ta pasa un biaha mas segun protocol palabra

Dolor di garganta y dolor di cabez of dolor di lomba riba nan mes no ta motibo pa dokter di cas manda haci un Covid test. Segun presidente di Asociacion di Dokter di Cas, HAVA, dr. Joaquin van Trigt, e ta un palabracion estricto entre tur dokter di cas y DVG. Cada asistente di dokter sa cual ta e preguntanan cu mester haci y ki ora ta referi pa bay haci e Covid test. E sintomanan importante ta keda problema pa hala rosea y tambe e perdida di holor y smaak.

Segun dr. van Trigt, locual a sucede den ultimo dianan ta cu a enfoca riba e asina yama Cluster di Gusto. Pues, tur e hendenan cu tabata sea na Gusto, Craft, the Mill y otro barnan y nightclub. E enfoke tabata pa test tur hende cu a frecuenta e lugarnan aki y a haci miles di test, hasta entre esnan cu no tabatin sintoma. Esaki ta basa riba e protocol pa atende un brote grandi manera cu a conoce. “Nos mester a indentifica tur cu tabata den e area y test nan. Nos mester a pone e brote aki riba mapa.” Consecuentemente, por a nota e filanan na diferente laboratorionan mirando cu a pidi tur hende cu tabata den e area pa bay test.  “Aruba tabata tuma como 1000 test pa dia, den e periodo aki.” Mientrastanto a caba cu e proceso aki.

Pero a identifica mas tanto posibel tur esnan cu tabata kier a yega na nan y awor ta bay back na e sistema regular di triage. Esey ta encera cu personanan cu ta sospecha cu nan por a drenta den contacto cu un persona cu a test positivo, pero no tin sintoma nan mes, por hasta bay traha pero cu medidanan di precaucion.  Esaki ta diferente cu e instruccion na Maart, April cu tabata manda hende automaticamente den cuarantena.

“Ta nos asistentenan ta aplica e triage, unda nan a haya un serie di pregunta cu nan mester haci, pa determina si un pacient mester bay test of no. Dolor di cabez, dolor di garganta, dolor di curpa por ta sintoma. Pero pa Covid, mester tin otro sintoma. E principal ta problema respiratorio, esta dificultad pa hala rosea, tosamento y awor ta reconoce cu perdida di holor y smaak ta aspectonan mara na Covid,” dr. van Trigt a bisa.

Potret di archivo.