Ayera merdia durante un conferencia di prensa, director di AZV Sr. Edwin Jacobs, hunto cu representantenan di HAVA y ASHA a firma un acuerdo di cooperacion pa asina fortifica e cuido medico na Aruba.
Jacobs a splica cu mirando back riba 2023 un di e acontecimentonan mas exitoso y importante pa loke ta Ministerio di Salud Publico ta e firmamento di e acuerdo di dia 6 di juli, e asina yama ‘Zorg Akkoord’ cu e stakehodlersnan den e sector di cuido.
A base di e acuerdo aki, el a indica, a identifica e areanan den cuido cu lo wordo fortifica e proximo añanan y asina tambe percura cu den futuro por tin un sistema di cuido cu ta keda financieramente pagabel, pero cu tambe por cumpli cu e demanda cu ta bay tin di parti di nos comunidad.
E acuerdo di cooperacion cu a ser firma entre e Asociacion di Dokternan di Cas di Aruba (HAVA) y Asociacion di Specialistanan (ASHA) cu ta traha na hospital di Aruba ta deriva directamente di e ‘Zorg Akkoord’ aki.
“Esaki ta bira hopi importante pa e parti di fortificacion di e prome liña, pero tambe e bahamento di presion riba e segundo liña di cuido na Aruba e proximo añanan,” el a resalta.
Di parti di HAVA, dr. van Trikt a expresa cu e hopi contento cu e acuerdo di cooperacion ta un realidad. “Mi ta contento di ta para aki awe, mi ta considera awe un dia bastante importante pa nos como dokternan di cas, pero tambe pa e specialistanan unda cu nos ta bay firma un acuerdo unda nos ta delinea con nos ta bay traha hunto den e proximo añanan pa purba di mehora y mantene e calidad di cuido na Aruba,” el a remarca.
Dr. van Trikt a indica cu tin cierto añanan caba cu nan ta ripara cu tin mehoracion cu ta posibel y semper tin espacio pa brinda un miho cuido. El a indica cu nan a spreek af cu otro, esta HAVA y ASHA, cu nan ta bay sinta hunto wak unda e puntonan dificil ta, nan ta bay colabora mas hunto, nan ta bay purba di target unda e problemanan den e cadena di cuido ta sinta y nan ta bay busca solucion pa yega na un cuido cu ta mas accesibel, mas eficiente y menos costoso pa Aruba.
El a subraya cu e dokter di cas ta keda e punto primordial unda e pashent por busca su ayudo prome y e punto unda e gastonan di cuido ta mas eficiente y menos costoso. Asina tambe, el a agrega, nan ta purba baha e listanan di espera di e segundo liña na hospital door di mantene e cuido innecesario pafo di e segundo liña y mas den e prome liña unda e dokternan di cas ta bay hunga un rol hopi importante.
