Maske inicialmente asociacion di dokter di cas HAVA tabatin un accion planea pa awe, a dicidi di cancela esaki.
“Despues di a reuni cu AZV ayera mainta, HAVA a dicidi di pospone nan medidanan por lo pronto. Nos ta haya cu tin oido y posibilidad pa sigui delibera den e proximo dianan pa asina nos ta por spera cu nos lo yega na un acuerdo pronto. Esaki ta nifica cu dokternan di cas lo ta habri e siman ki normalmente.
Nos kier aclaria cu nos meta no ta pa perhudica nos patientnan. E ta pa sigura cu integridad di nos cuido medico keda garantisa. Pa sigura nos patientnan cu bo dokter di cas por sigui brinda bo e servicio cu nan ta custumbra nos di Hava. Cu e medidanan aplica nos practicanan lo encontra problemanan financiero severo cu consecuencianan grandi pa e continuidad di cuido.
Esaki tambe ta nifica comunicado di prensa cu AZV a publica ayera nochi, cu dokternan di cas ta sigui cu nan medidanan NO ta corecto.”
Puntonan pakico a bay den accion
-Dokternan di cas ta traha ya añas caba cu un presupuesto mensual. Di e honorario aki mester paga tur gastonan incluyendo huur/hypotheek, awa, coriente, telefon, svb, salarionan, belasting, seguronan, lening, pensioen y material;
-Desde 2012 nos ta bringando pa ahustacion door cu gastonan ta subi pero te ainda no a logra;
-Door di e medidanan tuma door di Hulanda tur dokternan di cas lo wordo corta 11% riba nan presupuesto mensualmente door di AZV. Door cu nos gastonan no ta baha proporcionalmente hopi dokternan di cas lo haya nan mes den problema financiero;
-Esaki lo por nifica cu bo dokter di cas lo mester cera su practica lagando su pashentnan sin cuido basico;
-E 11% ki ta e resultado di e 5.5% anuncia door di gobierno/AZV ta wordo aplica durante full e aña di 2020. Esey kiermen cu entrante 1 di juli e 5.5% ta wordo corta dobel (terugwerkende kracht). Esaki mientras cu cuminsamento di aña no tawatin crisis ni medida imponi door di Hulanda ainda;
-E medidanan tuma door di AZV a wordo tuma sin nos input. Nos a djis wordo informa cu nan mester a wordo tuma;
-Cuido medico ta un derecho principal di tur hende. E mester ta garantisa awe y den futuro.
