Stichting Reclassering en Jeugdbescherming ta haya importante pa trece na atencion di comunidad cu core tras di stuur bou influencia di te hasta 2 cerbes mes, por ta rason pa polis stop un persona. Alabes e fundacion ta informa cu pronto lo bin cu un programa pa preveni recidivismo di ofensanan sexual.
Marina Jones, coordinado di seccion sancion alternativo di Reclassering, durante un entrevista cu Bon Dia ta conta cu mirando cu bebemento ta algo cu ta comun den nos comunidad, e fundacion kier a conscientisa riba e topico. Segun sra. Jones, tin un cantidad grandi di personanan cu despues di a ricibi varios encuentro cu polis pa via di core bou influencia di alcohol, ta haya nan mes tumando un les (leerstraf) na e fundacion.
Sra. Jones ta comparti e informacion aki pa asina personanan ta mas consciente, unda e frontera ta para pa loke ta trata core bou influencia. Asina e ta mustra riba e echo cu segun ley ya caba cu 2 cerbes por para un persona pa core auto, dependiendo riba ki proporcion e curpa di e persona tin. Ademas ‘hopi hende ta core y yega cas bon, pero nan mester ta consciente cu despues di cierto nivel di consumo di alcohol bo no por diferencia cierto cosnan mas’.
E consecuencia cu maneha bou influencia ta trece den caso cu causa un accidente ta algo sumamente pisa, dependiendo con esaki a pasa. Sinembargo e boet mara na esaki ta hopi biaha sumamente halto. Ademas si causa un accidente bou influencia e seguro di auto no ta cubri e accidente y si e otro partido den e accidente a keda herida of a sufri gravemente, e gastonan di AZV ta cay pa e persona cu a causa e accidente.
“Na prome instante AZV ta cubri si bo a haci daño na otro persona den un accident asina, pero despues cu nan haya sa cu bo tabata bebiendo nan ta bin busca e suma cerca bo. Unabes bo ta envolvi cu alcohol e ta cambia henter e situacion cu seguro di AZV. Te hasta bo por ta mara pa paga un suma pa un gran parti di bo bida pa un escogencia eroneo.”
Les pa ofensanan di indole sexual
Aunke e fundacion ta drenta den accion te despues cu algo a tuma luga caba y Ministerio Publico a mobilisa, Reclassering ta keda monitor problemanan cu ta surgi den sociedad maske e leynan cu nan ta opera bou di nan no ta laga e fundacion haci cualkier cos, mirando nan tin tareanan set caba.
Pues den cuadro di esaki e fundacion a splica cu nan ta preparando un programa di leerstraf nobo dirigi riba personanan cu a comete crimen den indole di abuso sexual, mirando e desaroyonan ultimo tempo den noticia cu a bin dilanti, specificamente abuso di menor.
Esaki ta un programa cu hues y of fiscal por bay exigi pa un sospechoso sinta si nan ta acusa di abuso sexual den cualkier dimension. Den comparacion cu e leerstraf pa maneha bou influencia, esaki lo ta enfoca riba un grupo mas chikito. “Nos no ta duna terapia specificamente pero si e por sirbi manera un tipo di terapia en fin.”
