(AP) – Harvey Weinstein ta na caminda di regreso na Los Angeles pa prome biaha den un aña, pero e no ta pa un vakantie. Weinstein lo bolbe bek Los Angeles pa enfrenta mas cargo ainda.
E abogado di e productor ken tabata hopi elogia y aworaki ta critica, Mark Weisman ta conta TMZ cu Weinstein su ekipo legal a ser notifica cu nan cliente lo ser extradita riba diamars y transporta na Los Angeles. E notificacion a laga e ekipo sa cu na e momento ey Weinstein ya tabata den e avion di New York caminda pa Los Angeles pa un audicion potencialmente riba diaranson.
Otro abogado di Weinstein, Norman Effman ta agrega cu e ta kere cu Weinstein ta den un avion federal medicamente ekipa pa por lidia cu tur e condicionnan medico di Weinstein. Te ainda esaki no a ser confirma. En todo caso, e hecho ta cu Harvey Weinstein lo mester enftrenta su cargonan den Los Angeles den huicio.
Desde por lo menos 2019, Harvey Weinstein no por a sali for di New York pa motibo cu e tabata bao investigacion pa cu un caso di violacion, cual a cuminsa un bataya legal y a caba den su conviccion aña pasa, cu un sentencia di 23 aña largo. E huicionan aki y e sentencia aki tambe ta trata solamente e casonan den New York. Te ainda Weinstein tin cargonan den Los Angeles cu e tin cu enfrenta, cual ta e motibo di su extradicion.
Manera antes reporta, Harvey Weinsten a ser acusa di 11 crimen relaciona cu asalto sexual envolviendo 5 diferente hende muhe, cual a causa cu despues di e prome muhe cu a acusa Weinstein, y a causa cu e investigacion a cuminsa tuma luga, hopi otro hende muhenan a bin dilanti acusando Weinsten sea di conducta inapropia sexual, asalto sexual of violacion, y den hopi diferente ciudad di costa pa costa.
Segun oficialnan e transferencia di Weinstein lo tin e FBI asistiendo den e transporte, escoltando Harvey for di New York te cu Los Angeles, y lo keda te entrega Weinstein na autoridadnan di Los Angeles na momento di e aterisahe.
Representante di Weinstein Juda Engelmayer ta conta TMZ cu aunke tabatin un intento di acuerdo di negociacion pa por evita of por lo menos atrasa e extradicion di Harvey, su persona tabata sa caba cu algun dia esaki lo tuma luga. Engelmayer tambe a comenta cu su persona ta hopi desapunta den e fiscal di e districto di Los Angeles County, pa motibo cu su persona no a warda pa e hues su comentario.
Engelmayer ta revela cu e ekipo lo ta luchando pa primeramente Weinstein ricibi e cuido medico cu e tin mester, mientras agregando cu e tin e derecho di un proceso unda cu su salud ta manteni den consideracion y ta provee e cuido necesario pa asina e por eherce su derecho di huicio manera mester ta y cu Weinstein ta presumi inocente te ora cu e ser comproba culpabel.
