Den luna di september ultimo Departamento di Naturalesa y Medioambiente (DNM) a publica e Strategia y Plan di Accion Nacional pa Biodiversidad 2024-2030. E plan aki ta delinea strategianan clave pa desaroya positivamente naturalesa, medioambiente y biodiversidad di Aruba.

E Strategia y Plan di Accion Nacional pa Biodiversidad (National Biodiversity Strategy and Action Plan na Ingles, NBSAP) pa Aruba tin como meta pa harmonisa e desaroyo di e isla cu naturalesa, sigurando cu e beneficionan di biodiversidad ta ser disfruta pa e generacionnan presente y di futuro. E plan ta enfatisa e balornan esencial di naturalesa y ta boga pa tanto un propuesta ecocentrico como un propuesta cu centra den naturalesa pa conservacion.

DNM ta remarca cu hende como parti di e ecosistema ta beneficia di servicionan esencial cu naturalesa ta brinda manera aire limpi, awa y alimentacion. E biodiversidad di e isla no ta solamente crucial pa e balansa ecologico, pero tambe ta sostene turismo, cual ta un parti importante di economia di Aruba. Sinembargo, e documento ta señala, e recursonan natural aki ta core peliger pa motibo di actividanan humano, haciendo cu ta necesario di tuma accion urgente pa proteha y restaura naturalesa.

Aruba ta enfrenta hopi desafionan ambiental, incluyendo destruccion di habitat, contaminacion, sobrepesca y cambio di clima. E peligernan aki a trece un bahada den biodiversidad, cu varios especienan ta core risico di extension. E densidad di poblacion halto y actividadnan economico di e isla ta empeora e asunto aki mas.

E NBSAP tin tres meta principal y strategico pa ataca e desafionan aki: primeramente nan kier reduci peliger pa biodiversidad. Esaki ta inclui medidanan pa proteha ecosistema- y habitatnan, controla especienan invasivo y mitiga e impacto di polucion y cambio di clima.

Di dos meta ta uso duradero di recursonan natural. Esaki ta inclui promove practicanan sostenibel den agricultura, pesca y turismo pa asina segura un balansa ecologico riba termino largo.

Di tres meta ta introduci hermentnan y solucion pa implementacion. Esaki ta inclui desaroya polisa, ley- y structuranan pa apoya preservacion di biodiversidad y integra esaki den tur sector di sociedad.

Pa logra implementacion eficaz, DNM ta enfatisa, ta necesario pa establece condicionnan cu ta facilita e proceso, manera balornan comparti, structuranan di gobernacion fuerte y colaboracion intersectoral. Accion prioritario pa e fase inicial (2024-2026) ta inclui: formalisa e Derechonan di Naturalesa den constitucion di Aruba; promove e vision inclusivo di naturalesa pa Aruba; realisa balornan economico di e servicionan di ecosistema y e costo di degradacion di naturalesa; y formacion di grupo di trabou intersectoral pa guia implementacion, monitor progreso y evalua resultado.

Departamento di Naturalesa y Medioambiente (DNM) lo lidera e esfuerso aki, sosteni pa varios departamento gubernamental, NGOs, sector priva y academia. Esfuersonan di colaboracion ta necesario pa alinea iniciativanan y logra metanan strategico di un manera eficiente. E plan ta identifica algun logronan rapido y meta pa logra pa 2026, manera expande areanan protegi, restaura ecosistemanan degrada y eleva e concientisacion publico y educacion tocante biodiversidad.

E NBSAP pa Aruba ta representa un esfuerso comprehensivo pa integra preservacion di biodiversidad den e agenda di desaroyo di e isla. Pa medio di proteha y restaura ecosistemanan natural, Aruba ta bisti un futuro prospero y duradero pa su pueblo y e naturalesa. E plan ta yama pa accion colectivo di tur miembro di sociedad pa logra e vision di biba den harmonia cu naturalesa.

Naturalesa of ecosistemanan ta inherentemente conecta cu e prosperidad y bienestar di e habitantenan di Aruba. E diversidad di tanto di tereno como di ecosistemanan marino ta ofrece un multitud di servicio valioso, conoci manera servicio di ecosistema. Esakinan ta sostene e balor cu Arubianonan ta atribui na naturalesa y por ser clasifica den cuater grupo principal: suministro, regulacion, cultural, y servicio di sosten.

Servicio di suministro ta describi e productonan cu por ser obtene for di ecosistemanan, manera cuminda, awa, recursonan genetico, remedi y combustibel. Turismo tambe ta un producto di naturalesa. Aruba ta ‘bende’ su beachnan y ambiente natural manera un producto.

Regulacion di servicio ta e beneficionan cu hende ta obtene for di e regulacion di procesonan di ecosistema. Pa Aruba, un servicio di regulacion vital ta bini for di su mangelnan, dunando e isla proteccion pa inundacion y tormenta. Aruba su wetlands ta haci posibel e regulacion di e calidad di aire, purificacion di awa y almasenamento di carbon.

Rifnan di coral y poblacionnan saludabel di pisca papagayo tambe ta contribui na reposicion natural di playanan. Despues cu e parrotfish digeri e porcionnan comestibel for di e rif, nan ta saca esaki manera santo, yudando crea islanan chikito y playanan di santo.

Servicio cultural ta e beneficionan no-material obteni for di ecosistemanan. E especienan unico, endemico di Aruba, manera e Prikichi i e Shoco, por ser considera como parti di e herencia cultural.

Hopi generacion a ser lanta cu e especienan aki. E formacion di playa- y barancanan tambe ta contribui na ‘un sentido di luga’ pa e ciudadanonan local. E ambiente natural ta referi na un sentimento di conexion, pertenencia y familiaridad cu individuonan ta experiencia cu un luga particular of medio ambiente.

Ademas, accesibilidad na ambiente natural ta contribui na e salud fisico y bienestar mental di e poblacion local door di ofrece oportunidadnan pa ehercicio y relahacion.

Finalmente, servicio di sosten ta ser considera manera e weso di lomba di tur funcionamento di ecosistema. E servicionan aki, manera polinisacion, fotosintesis, y e ciclo di nutriente, ta sigura e crecemento y plamamento di mata y especie. E balor y rol extenso di vleermuizen di nanishi largo y lenga largo di Aruba den polinisa y plama simia di varios especie di mata endemico ta un ehempel local di e tipo di servicio aki.

Tur hunto, e servicionan di ecosistema aki ta vital pa mantene y sigui apoya e prosperidad y bienestar di e pueblo na Aruba. Cualkier limitacion riba e servicionan aki por impacta e salud directamente of indirectamente, seguridad, y prosperidad di pueblo di Aruba. P’esey, ta crucial pa sostene y engrandece e servicionan di ecosistema aki, pa garantisa un, futuro sigur y prospero.