CEDE Aruba cu su campaña di Happy to Give Back a logra recauda un suma extraordinario durante e Radio-y Telethon fin di augustus. Inicialmente a registra Awg. 211.461,11 na final di e iniciativa, pero mas donacion a sigui drenta y e placa di nan ‘street collection’ tambe mester a wordo conta acerca.
Originalmente, a pone como meta pa recauda AWG. 150.000 durante 48 ora di transmicion. Pa e team di CEDE Aruba y Happy to Give Back nan sorpresa, a recauda un total di Awg. 256.040,51. E director di CEDE Aruba, Sr. Daniel Tecklenborg ta sumamente contento y a bisa, “Con bunita e ta cu individualnan, commerciantenan y pueblo henter a uni y duna locual cu nan tawata por y a yuda nos logra surpasa e suma cu nos a spera.” Den totalidad, Happy to Give Back a recauda mas cu AWG. 970.000 desde april 2020.
Tur fondo recauda lo bay 100% pa instancianan social y esaki lo wordo parti entre Fundacion Pa Nos Comunidad, Ban Uni Man Pa Cria Nos Muchanan y YMCA. Sr. Tecklenborg tambe a menciona cu e suma aki ta substancial y sigur lo sigui yuda personan den necesidad, pero cu esaki ta solamente un comienso, mirando cu tin un aumento di famianan cu ta registra pa ricibi ayudo. Na e momento aki tin un cantidad di 13.000 famia registra na varios instancia.
CEDE Aruba y Happy to Give Back ta invita tur persona of organisacion cu ta desea di haci un donacion (grand of chikito) pa bishita www.happytogiveback.com pa mas informacion tocante con por contribui na e bunita causa aki.
Happy to Give Back ta duna un gradicimento special na Setar, Fundacion PANA, Harbour House project, EY, Arugas. Nagico. Fred – in memory of Dr. B. Kennedij Dermatoloog, WOW, Sasaki & Tanki Leendert Service Station y ASHA – Associacion di Specialista Aruba cu a haci un donacion di AWG. 5.000 of mas. Tambe, Blue FM, Canal 90, Cool Fm, Heart Radio, Magic FM, Top FM, Hits 100, Latina FM, Radio Bo Guia 88.9 FM, TeleAruba y Elite studios cu a logra haci e Happy to Give Back Radio-y Telethon uno exitoso, tur boluntario cu a duna nan tempo valioso y tambe otro personanan y organisacionnan cu a haci donacion generoso.
