Dialuna pasa, CEDE Aruba hunto cu Aruba Time Share Association, sosteni pa Aruba Tourism Authority a lansa Happy Community Iniciative, un plataforma unda turistanan por haci un donacion na e proyecto pa un bon causa.
E prioridad di e plataforma ta basa riba e proyectonan cu ta dedica pa hubentud. Turistanan por haci un donacion via di e website www.happycommunityaruba.org of tambe uzando e prome ‘Donation Kiosk’ digital den Caribe, cual lo ta disponibel den diferente lobby di Time Share Resorts.
Banda di esaki, algun resort lo ofrece e posibilidad pa haci un donacion tambe na momento cu e turista haci su check out.
Kimberly Mathilda, lider di proyecto di Happy Community, a splica cu e investigacion a cuminsa desde 2017, ora CEDE Aruba hunto cu ATSA a haci un acuerdo pa traha hunto pa duna sosten na un proyecto na Aruba. Aruba tin hopi problemanan social, pero esun cu nan kier duna apoyo p’e ta pa e mucha y hobennan.
Mathilda a bisa cu Happy Community Initiative ta enfoca riba e desaroyo di mucha y hobennan. E tres problema social mas importante cu lo cuminsa apoya ta, cu despues di scol, entre muchanan for di 12 te cu 18 aña, 4 di cada 10 mucha ta keda nan so na cas. Di dos ta cu e muchanan no tin caminda pa bay ora nan tin vakantie, y di tres problema ta cu 6 di 10 mucha no ta caba scol.
Pa e motibonan aki, nan a presenta un solucion pa crea programanan despues di scol, actividadnan den vakantie ora e muchanan ta bay haci cosnan cultural y deporte pa stimula e mucha, y di ultimo, ta duna e apoyo pa e muchanan cu no ta caba scol, ofrece pa nan un trayecto laboral pa nan por caba scol y haya un trabou.
