(AP) – Hapon y Merca riba diaranson a firma un acuerdo pa desaroya hunto un tipo di sistema di defensa di misil nobo, mientras aliadonan ta busca manera pa defende nan mes contra e menasa di armanan hipersonico, cual China y Rusia tin den nan posesion caba y Nort Korea den fase di testing.
Inicialmente a yega na e acuerdo aki entre prome minister Hapones, Fumio Kishida y President di Merca Joe Biden na e simposio augustus ultimo y a keda reafirma entre e lidernan durante Kishida su bishita na Washington. Gilde Phae Interceptor ta den plan pa desaroya pa aña 2030.
E acuerdo diaranson ta determina e alocacion di responsabilidad y proceso di tuma decision, un paso grandi den e proyecto, segun oficialnan di ministerio di defensa di Hapon a bisa. Nan tin speransa di dicidi riba un contratista Hapones y cuminsa cu e proceso di desaroyo pa aña 2025.
Armanan hipersonico ta diseña pa surpasa Mach 5, of e velocidad di zonido, como un menasa na sistemanan di defensa di misil regional cu nan velocidad y facilidad pa maneha. Desaroya interceptor manera esaki ta un desafio.
Ministerio di Defensa Hapones a yama esaki “un problema cu ta pone presion” y a nota cu e armanan di e tipo aki den e region a mehora dramaticamente den e añanan recien.
Bao e areglo, Hapon ta responsabel pa desaroya un parti di e interceptor su punta cu ta separa den espacio pa destrui e atake binidero, ademas di e motor di e racket, e oficialnan a bisa.
Hapon a aloca 490 miyon dollar pa e desaroyo inicial y e test di e interceptor, segun e ministerio.
E gasto aki ta inclui creacion di e componente pa dos compania, cu ta desaroyando e arma den un competencia lidera pa U.S Missile Defense Agency. Un compania lo ser scogi pa e proyecto entre Raytheon Technologies y Northrop Grumman.
MDA a calcula cu e gasto pa desaroya e interceptor di misil lo surpasa 3 biyon dollar, incluyendo Hapon su contribucion di 1 biyon dollar.
E interceptor lo keda despacha cu destruidornan di clase Aegis, manera e ship-to-air Standard Missile-3 cu Hapon anteriormente a co-desaroya cu Merca.
Hapon tin tempo ta acelera su avance militar pa motibo cu ta enfatisa e necesidad di fortalece su defensa contra menasanan cu ta keda crece. Hapon tambe a significantemente los su politica pa permiti e co-desaroyo di armanan letal cu tercer paisnan.
