Hapon ta habri centronan pa vacuna 2 luna prome cu olimpiada

(AP) – Hapon a mobilisa dokter y enfermeronan militar pa vacuna tur e localnan di edad avansa den Tokyo y Osaka, como un intento desespera di e gobierno pa por acelera e vacunacion y caba cu e infeccion di coronavirus prome cu olimpiada cuminsa den 2 luna.

Prome Minister Yoshihide Suga ta determina pa inicia e olimpiada na tokyo despues di un retraso di 1 aña y a propone su mes un meta ambicioso, y caba di vacuna e 36 miyon di ciudadanonan di edad avansa prome cu e olimpiada cuminsa aki 2 luna.

E meta aki ta bin, ya cu tin hopi protesta y preocupacion andando pa cu e olimpiada, ya te ainda tin hopi local cu no ta vacuna ainda, y solamente tin 2 luna prome cu e evento tuma luga. Suga su gobierno ta constantemente ampliando e duracion di e estado di emergencia for di April, cada biaha poniendo medidanan mas estricto. Actualmente, Tokyo y algun otro ciudad cual hunto ta cubri 40% di e pais su populacion, ta bau di e estado di emergencia aki, y un extension di e estado aki ta inevitabel.

Mirando cu te ainda e casonan di COVID ta aumentando, Suga ta bisa cu e vacunanan ta clave pa por controla e infeccionnan. E vacuna te ainda no ta un condicion pa por organisa e olimpiada, y te hasta a palabra cu Pfizer pa haci donacion di vacuna na e atletanan cu lo competi.

Suga ta comenta cu e ta un meta di acelera e vacunacion di e ciudadanonan ta un meta inevitabel, bisando “nos lo haci tur lo posibel pa cumpli e meta y proyecto aki, logrando vacuna tur nos ciudadanonan pa asina nos tur por regresa na nos bida diario di antes.”

Dos centro masivo a habri, contratando 280 medico militar y 200 medico civil, cu e plan di vacuna por lo menos 10,000 persona pa dia na Tokyo y 5,000 persona pa dia na Osaka den e siguiente dos luna

Na Osaka, unda cu e hospitalnan no tin mas capacidad pa atende mas pashent, y cada dia tin mas y mas persona ta infecta of fayece na cas, miles di persona a cuminsa bay e centro di vacunacion pa nan por ricibi nan vacuna mientras cu na Tokyo, hopi ta bisa cu nan mester a tuma taxi of bus pa por evita e treinnan pa por yega na e centro y ricibi nan vacuna.

E personanan cu a ricibi nan vacuna na e dos centro aki, ta e prome personanan na Hapon cu a ricibi vacuna di Moderna, un di e dos marcanan di vacuna cu Hapon a aproba diabierna pasa. Prome, Hapon tabata uzando solamente Pfizer, di e cual solamente 2% di e populacion a ricibi tur 2 dosis.

E vacunacion a cuminsa cu e trahadonan di salud na mita di februari, despues di un retraso debi cu no por a tuma un decision tocante e testnan adicional cu Hapon kier a haci pa cu e testnan aki, un decision cu expertonan ta bisa solamente ta retrasando e proceso di vacunacion y no tin proposito medico.

Vacunacion pa e siguiente grupo cual ta e ciudadanonan di edad avansa y di riesgo halto a cuminsa na mita di april, y cada biaha ta baha mas y mas pa motibo cu no tin un distribucion claro, e procedura di reservacion no ta eficiente y tin un necesidad di personal medico.

E dia cu e proyecto aki lo cumpli no ta calcula ainda, pero e gobierno tin e speransa cu despues di e aprobacion di diabierna pa cu Moderna y AstraZeneca, lo tin un cantidad mas grandi di vacuna disponibel, y cu e dos centro aki lo acelera e vacunacionnan.

“E cantidad di vacunanan duna mester aumenta, pa asina nos comunidad por sinti mas sigur, pa motibo cu e falta di vacuna ta afecta e bida social di tur hende, y naturalmente nos economia tambe”, Munemitsu Watanabe, un trahado di oficina di 71 aña di edad ta comenta. “Si 80 pa 90% di nos populacion vacuna, mi ta kere nos lo por organisa y tin e olimpiada sin ningun problema”

Pa hopi hendenan e meta aki ta uno imposibel pa cumpli, y mucho menos den e tiki tempo cu ta keda prome cu e olimpiada, mirando cu aworaki solamente personanan di 65 aña bay ariba so por vacuna, y algun oficialnan ta bisa cu e lo por tuma te cu otro maart otro aña, pa esunnan mas jong por ta completamente vacuna.

Un di e problemanan mas grandi cu Hapon tin pa cu e meta aki, ta cu tin un escasez grandi di personal medico, pa motibo cu legalmente solamente mediconan por duna e vacuna y mayoria di nan ta tratando e pashentnan cu tin COVID-19 caba.

E desesperacion a haci cu Suga a tuma e decision di laga dentistanan y enfermeronan retira tambe duna e vacunanan, y riba dialuna a pidi ayudo di e boticario nan tambe. Suga a bisa cu e ta considerando agrega paramedico nan y tecniconan di laboratorio clinico den e lista di e personanan autorisa pa duna vacuna, y asina por tin un ekipo di miles di persona cu por forma personal medico, y yuda duna e vacunanan. Pero esaki ta trece e consecuencia, cu ainda mas preocupacion lo drenta e ciudadanonan, ya cu e rekisitonan pa por duna e vacuna ta uno menos estricto.