(AP) – Poeta y novelista Sur Koreano Han Kang a ser otorga e premio Nobel Prize den literatura diahuebs pa un curpa poetico di trabao cu segun e comite Nobel ta “confronta traumanan historico y ta expone con fragil e bida humano ta.”
Un strea literario internacional cu a gana varios premio na Sur Korea y Europa, Han ta e prome muhe Asiatico y prome escritor Sur Koreano den gana e premio di literatura di Nobel. El a ser entrega e premio pa bukinan incluyendo “The Vegetarian” y “Human Acts,” cu ta explora e dolor di ser humano y cicatriznan di Korea su historia turbulento.
Miembro di comite di literatura Nobel Anna-Karin Palm a bisa cu Han ta skirbi tocante “trauma, dolor y perdida,” sea di manera individual of colectivo, “cu e mesun compasion y cuido.” “Y esaki, mi ta kere, ta algo cu ta hopi remarcabel,” Palm a bisa.
President di comite Nobel Anders Olsson a elogia Han su “empatia pa e personanan vulnerabel, hopi biaha bida di hende muhe” di su personahenan. “E tin un conscientisacion unico tocante e conexion entre curpa y alma, esnan cu ta biba y esnan cu ta morto,” Olsson a comenta.
Han ta e di dos nacional Sur Koreano cu a yega di gana un premio Nobel. Ex President difunto Kim Dae-jung a gana e premio di paz den 2000 pa su esfuersonan pa restaura democracia den Sur Korea durante e pais su mando militar anterior y mehora relacionnan cu e rival Nort Korea.
Papiando cu Swedish Academy via telefon, Han a bisa cu net e tabata cabando di come cu su yiu na cas ora cu el a ricibi e yamada cu e noticia. El a bisa cu e ta ambos “honra” y asombra di bira Sur Korea su prome laureate di literatura Nobel.
“Mi a crece cu literatura Koreano, na cual mi ta sinti hopi cercano,” Han a expresa, ken su tata y ruman homber ambos tambe ta escritor. “Mi ta spera cu e noticia aki ta algo bon pa e lectornan di literatura Koreano y mi amigonan, escritor.”
Han ta gana e premio Nobel durante un tempo unda e influencia global di cultura Sur Koreano ta aumentando, cu den añanan recien a inclui e exito di peliculanan di director manera Bong Joon-ho su pelicula ganador di Oscar “Parasite,” e drama di sobrevivencia di Netflix “Squid Game” y e fama mundial di gruponan di K-pop manera BTS y BLACKPINK.
Han, di 53 aña, a gana International Booker Prize for fiction traduci den Ingles den 2016 pa “The Vegetarian,” un novela den cual un muhe su decision pa stop di come carni tin consecuencianan debastador.
Aceptando e premio ki, Han a bisa cu skirbi ta “un manera di cuestiona p’ami.”
“Mi ta purba completa mi preguntanan via e proceso di scritura y mi ta purba keda dentro di e preguntanan, algun biaha doloroso y algun biaha, wel, algun biaha exigente,” el a expresa.
Han a haci su gran debut como un poeta en 1993; su prome coleccion di storia a keda publica den 1995 y su prome novela, “Black Deer,” den 1998.
