E Sistema Sac Actun, localisa na noreste di ciudad turistico Tulum, awor ta suma 347 kilometro di cueba subacuatico despues di absorbe e Sistema Dos Ojos. E investigadornan ta spera cu e descubrimento lo yuda comprende e desaroyo di bida riba peninsula di Yucatan. E Sistema Dos Ojos, cu tabata ocupa e di cuatro lugar den tamaño na mundo, lo desaparece como nomber di sistema debi na e fusion cu Sac Actun, segun e normanan di speleologia.
Un cueba inunda ubica na sureste di Mexico lo ta esun mas grandi di mundo, despues di descubri un conexion entre dos sistema di cueba bao awa den e zona, asina un ekipo di exploracion a bisa, un hallazgo di cual ta spera cu e por tira un luz nobo riba e civilisacion Maya.
“E ekipo a logra -despues di un intenso temporada di trabao di 10 luna- descubri e conexion di e dos sistemanan di cueba inunda mas grandi di mundo,“ un comunicado di e proyecto Gran Acuifero Maya (GAM) a bisa.
E director di exploracion di e proyecto GAM, Robert Schmittner, a cuminsa bucea a traves di centenares di kilometro di cueba sumergi den e region binti aña pasa, y hunto cu un ekipo di buzo di cueba a dedica e ultimo 14 aña na e Sistema Sac Actun, segun e website di e proyecto.
E director di e proyecto GAM y investigador di e Instituto Nacional di Antropologia y Historia di Mexico, Guillermo de Anda, a califica e hallazgo di “asombroso” y ta spera cu e lo yuda comprende e desaroyo di bida riba e peninsula di Yucatan.
“E ta duna nos un enorme y maraviyoso perspectiva pa comprende e patron di asentamento antiguo, con nan por a desaroya,” e arkeologo subacuatico a bisa. “E ta laga nos comprende di manera hopi mas cla con e asentamentonan grandi pre-hispanico cu nos conoce, a surgi,” de Anda a agrega.
Peninsula di Yucatan ta yen di relikia monumental di e Mayanan, cu tabatin ciudadnan basa riba un red extenso di pos vincula cu e awanan subteraneo, conoci como cenote.
Algun cenote a haya un significacion religioso particular pa e Mayanan, cu tin nan descendientenan habitando e region ainda.
