Half marathon celebrando nan 35 aña di careda

IBISA hunto cu Alhambra Casino ta organisando un half marathon. Aruba cu lo tuma luga 22 di maart 2020. E aña aki ta celebra 35 aña di e carera hunto cu 35 aña di Alhambra Casino.

Hefe di Departamento di Desaroyo den Deporte, William Erasmus a comparti tocante e preparacion nacional pa e half marathon, cu ta algo grandi pa Aruba. Tin cupo pa mil participante y registracion lo ta habri pa mañan.

E competencia lo cuminsa pa 5am for di John Laveist y lo termina na Alhambra Casino. Lo tin bus for di 4am cu lo transporta pa atleta cu lo bay competi y pa e relay team.

Pa locual ta trata e grupo di relay, lo tin un prijs special pa corporate relay pa 4 persona y pa studiante grupo di 4, pero ambos mester trece un carta di e scol of compania como prueba, sino lo cay bou di open relay. Cu esaki nan kier stimula compania pa nan bin cu nan mesun trahado y pa studiante tambe por representa di miho manera y motiva mas mucha pa participa den carera. Tambe nan lo tin e open relay pa duna hende mas oportunidad pa participa.

Pa esunnan cu registra pa e Early Bird prome cu 14 februari lo tin nan nomber riba nan BIP number, sea individual of relay. Nan tin categoria nobo pa open relay, pa nan ganado overall female y male individual y tur ta di UB 20 te cu 60+.

Rammy Ramada, director di Patrishi Sports, a bisa cu registracion lo tuma luga cu pago online, cu posibilidad pa hende cu ta bin di afo por participa mas facil, y tambe hende di Aruba por sigura nan spot mas trempan.

“E registracion lo tuma luga na IBISA Oranjestad y IBISA San Nicolas manera custumber for di 8am te cu 4pm. Tambe ta posibel na Patrishi store, nos ta habri di diamars te cu diasabra di 10am te cu 6:30pm”, Ramada a splica

Pa locual ta busca e pakete, e ta manera semper, cu por pasa busca na Alhambra Casino diasabra 21 di maart for di 9am te cu 3pm prome cu e carera. Ta recomenda pa registra na tempo.

Marketing Manager di Alhambra Casino, Annie Dirks, a comparti cu pa nan ta un honor pa yuda den deporte of comunidad, pa asina duna ehempel y duna sosten. “Nos lo ta for di 4am cla pa yuda. Danki na IBISA pa confiansa y pueblo pa 35 aña di Alhambra Casino.”