E dos nacionnan cu hunto ta ocupa e teritorio di e isla Hispaniola a keda converti den e centro di e pandemia den region di Caribe. Hunto e dos islanan ta cubri 28.793 di e total di e 36.726 casonan detecta di Covid-19 den e region, pa un porcentahe di 78,4% di e total.
Republica Dominicana (24.105 caso) ta manehando un promedio di cerca di 500 caso nobo pa dia, di cual un gran parti, alrededor di 75% ta den ‘Gran Santo Domingo’cu ta encera Distrito Nacional y gran parti di e provincia Santo Domingo. Ministerio di salud ta informa cu e flexibilisacion di e medidanan di cuarentena y toque de queda a conduci na un aumento den e cantidad diario di caso nobo, motibo pa cual diaranson pasa no a pasa pa fase III di e ‘descalada’.
Mientras tanto na e pais bisiña e situacion ta birando mas serio dia pa dia. Algun siman atras Haiti ainda tabatin menos caso di coronavirus cu Cuba, pero na e momento aki ta conta cu dos biaha mas hopi caso cu e isla aki. Ayera Haiti tabata conta 4.688 caso mientras Cuba ta registra 2.280 caso, cu ademas 1.999 caso di recuperacion. Na Haiti no ta registra tur caso di recuperacion, y e cifra oficial a keda na 24 pa varios dia caba.
Organisacion Panamericano di Salud (PAHO) ta bisa cu atencion special mester bay na e areanan rural unda hende ta migra mas y facilidadnan medico ta hopi scars. Otro foco di atencion ta e frontera cu Republica Dominicana pa e gran cantidad di Haitiano cu ta regresando nan pais ainda y ta contribui na e riesgonan.
