Un demanda pa difamacion contra un activista kende a acusa fundado di un orfanato na Haiti di ta un pedofiel serial a keda resolvi, cabando un demanda cu a lastra durante seis aña, segun un abogado.
Compania di seguro di Paul Kendrick a bay di acuerdo pa paga $3 miyon na Hearts with Haiti, pero nada na e fundado di e orfanato, Michael Geilenfeld, segun abogado Mark Randall, kende ta representa Kendrick, a bisa AP. Hearts with Haiti y Geilenfeld a retira nan keho di difamacion, el a bisa.
E acuerdo ta caba un caso cu a lastra desde 2013. Kendrick a bisa cu e esfuerso tabata ta bal la pena pasobra e ta kere cu muchanan awo ta mas sigur.
Kendrick, kende ta mantene su acusacionnan contra Geilenfeld, a bisa cu e ta satisfecho pasobra e demanda a saca na luz e acusacionnan, y pasobra Geilenfeld no ta ricibi nada den e acuerdo. E placa lo ser uza pa e caridad pa yuda muchanan cu discapacidad na Haiti, el a bisa.
Paradero di Geilenfeld, un ciudadano Mericano, no ta conoci. E ex- ruman Catolico anteriormente a testigua cu e acusacion di abuso tabata ‘mentira vil, vil’.
Kencrick a bisa cu el a papia cu 16 hoben kende a bisa cu Geilenfeld a abusa di nan na Port-au-Prince añanan atras, tempo nan tabata mucha. Geilenfeld a funda e St. Joseph’s Home for Boys na Port-au-Prince na 1985.
Basa na North Carolina, Hearts with Haiti y Geilenfeld ta acusa Kendrick di daña reputacion di Geilenfeld y costa e organisacion caritativo miyones den un campaña di email cu a lanta acusacionnan sin base. Geilenfeld tambe a culpa campaña di Kendrick pa su 237 dia den prizon na Haiti.
Na 2015, un Hues Federal a otorga $14.5 miyon na Geilenfeld y Hearts with Haiti, a pesar di testimonio di shete homber kende a bisa cu nan a ser abusa sexualmente tempo nan tabata mucha. A entrega e caso di nobo den e estado despues cu un corte di apelacion a dicta cu un corte federal na Maine tabata e hurisdiccion incorecto.
Kendrick, di Freeport, Maine, a bira un bos durante e scandal di abuso di un iglesia na New England, y ta co- fundado di e chapter na Maine di Voice of the Faithful. El a bisa cu el a cuminsa ataca Geilenfeld despues di a scucha for di hombernan kende a bisa nan tabata victima di dje na Haiti.
Si e demanda lo a bay dilanti di un otro hurado, Kendrick a bisa cu lo tin mas victima dispuesto pa testigua.
Randall a bisa cu e disposicion di Geilenfeld pa retira e acusacion di difamacion a habri caminda pa un resolucion y retiro di e demanda. El a bisa cu ta un victoria pa e muchanan kende a beneficia for di e resolucion – y pa Kentrick pasobra e acusacion di difamacion a keda retira. “E resultado final ta cu muchanan ta sigur”, el a bisa, agregando cu e acusacion di e victimanan awo ta den man di oficialnan di ley.
