(DiarioLibre) – Ta premira cu e lidernan di Caribe lo debati e caos na Haiti den un reunion e siman aki y cu algun di nan ta kehando di e yegada masivo na nan paisnan di migrantenan cu ta huy di e pobresa y violencia.
Algun di e 15 miembronan ta proponiendo hiba e forsanan politico Haitiano na un tereno neutral pa nan por yega na un acuerdo ariba e realisacion di eleccionnan na e pais Caribense cu a perde tur e institucionnan elegi democraticamente.
Sinembargo, e comunidad internacional y funcionarionan local ta insisti cu no por realisa eleccionnan na Haiti te ora cu e violencia stop.
E minister di exterior Haitiano, Jean Victor Geneus, a adverti durante un encuentro di e Organisacion di Estadonan Americano cu e inseguridad a aumenta y lo extende pa paisnan bisiña.
“Nos mester absolutamente enfrenta e probelma aki na Haiti pasobra ningun otro pais den Caribe lo ta liber di e repercusionnan,” Geneus a señala.
E anfitrion di e encuentro lo ta e Prome Minister di Bahamas, Philip Davis, ken ta keha persistentemente di e costo di repatria miles di Haitiano y di Cubano aña pasa.
El a bisa cu Caricom mester yuda haya un solucion pa e crisis politico, economico y di seguridad na Haiti.
