(HaitiNews.net/DiarioLibre) – Haiti a pidi Nacionnan Uni pa tropa pa sigura su puerto, aeropuerto y otro sitionan strategico, despues di e asesinato di presidente Moïse diarazon pasa. Merca a sigura cu lo manda FBI y otro agente di seguridad pa Port-au-Prince. Despues di e asesinato “nos tabata pensa cu mercenario por a destrui cierto infrstructura pa crea caos,” ministro encarga cu eleccion Mathias Pierre a conta AFP.
Haiti ta enfrentando un crisis di poder despues di e asesinato, cu un promer ministro interino y un promer ministro designa dialuna pasa pa Moise, cu ta disputando e puesto di promer mandatario, mientras e pais no tin un parlamento funcionando. Den un intento pa sali di e incertidumbre di e disputa entre premier interno Claude y premier designa pero no huramenta Ariel Henry, Senado a vota riba un resolucion pa nombra senador Joseph Lambert como presidente provisional.
US State Department y Pentagon ambos a confirma cu a ricibi un peticion pa “asistencia di seguridad y investigacion” y a bisa cu fucionario ta keda den contacto cu Port-au-Prince, pero no a specifica si lo tin tropa militar envolvi.
Nacionnan Uni no a reacciona inmediatamente riba peticion pa comentario. Un fuente diplomatico di Nacionnan Uni a indica anteriormente cu lo mester un resolucion di Conseho di Seguridad pa por haci esaki, si Haiti pidi.
Na Haiti speculacion ta keda circula encuanto e persona o personanan cu por a planea e asesinato audaz, cu mayoria di e grupo asesino conforma pa mercenario Colombiano, entre nan varios ex-militar. No a duna te awor un posible motibo o nomber di esun cu lo a ordena e asesinato. Un ex-miltar Colombiano di 42 aña a keda señala como esun cu a recluta e mercenarionan di e pais ey, y ta e Colombiano number 18 cu a aresta. Segun e corant El Tiempo, e persona ta Gersain Mendivelso Jaimes.
