(DiarioLibre) – Ministerio di Defensa y forsa arma di Haiti a habri un proceso di inscripcion pa ciudadanonan Haitiano cu ta interesa den forma parti di ehercito. E proceso di reclutamento di candidatonan pa soldad ta bay tuma luga for di 1 te cu 12 di augusts di 2024.

Pa haya admicion como un militar, e ciudadanonan cu ta interesa mester tin e nacionalidad Haitiano, mester tin minimo 18 aña y maximo 25 aña di edad, mester gosa di un bon salud fisico y mental, mester tin un haltura minimo di 1. 60 meter pa hende muhe y 1.70 meter pa hende homber, y ademas nan mester ta disponible pa training militar.

E entidadnan a haci un yamadao na tur persona interesa pa presenta e siguiente documentonan: certificado y dossier academico di e di nuebe grado fundamental, certificado di bon conducta y moral gestiona pa e Polis Nacional di Haiti, un extracto di e Acta di Nacemento emiti pa e Archivo Nacional, un potret recien di paspoort, copia di e documento nacional di identidad (CIN), copia di e number di registro fiscal (NIF) y por ultimo un carta di presentacion y un carta di recomendacion.

E entidad a pone na disposicion un formulario di inscripcion den cual e ciudadanonan interesa mester yena nan datonan personal.

E yamado pa inscripcion ta sucede den momentonan cu Haiti ta combatiendo contra e gruponan arma y cu agentenan policial ta na e pais aki como parti di e mision multinacional di apoyo na seguridad.

E miembronan di gangnan na Haiti a bin ta realisando accionnan violento y enfrentando e mision di seguridad, a pesar di e yamado pa nan entrega nan armanan.

Dialuna ultimo na Puerto Principe bandanan arma a ataca e caravana di e prome minister Haitiano Garry Conille, na momento cu e tabata bandonando e Hospital Universitario Estatal di Haiti, unda el a haci un bishita di sorpresa.

Segun testigonan a informa EFE, durante varios minuut periodista- y polisnan Keniano a keda atrapa den e interior di e hospital publico di e capital debi na e atake di e coalicion di bandanan arma “Vivre Ensemble” (Vivir Juntos).

E atake di e gruponan violento, cu ta sigui controla e centro di e capital di Haiti, a eleva e tension un dia mas na e capital.

E forsa di e polis Keniano a cuminsa desplega na final di juni ultimo na Haiti, como parti di e mision multinacional di apoyo na seguridad cu e pais Africano ta lidera.

Conseho di Seguridad di ONU a autorisa na october di 2023 e envio di un mision di apoyo pa e Polis Nacional di Haiti, den respuesta na e solicitud realisa un aña prome pa e autoridadnan Haitiano pa elimina e violencia di e gruponan arma.