(AP) — Un ex-senador Haitiano, kende ta un di e sospechosonan principal den e asesinato di presidente Jovenel Moise, a bay di acuerdo ayera pa su extradicion na Merca pa enfrenta cargonan, segun su abogado a bisa AP.
No tabata inmediatamente cla na ki momento John Joel Joseph, kende a keda aresta na Jamaica na januari, lo keda extradita for di e isla Caribense, segun abogado di defensa, Donahue Martin a bisa. El a agrega cu esposa y dos yiu di Joseph a solicita asilo na Jamaica y ainda ta wardando un contesta.
Martin a nenga di duna comentario riba e acuerdo di extradicion, y no a revela mas detaye inmediatamente. Oficialnan di gobierno Haitiano no a responde na solicitudnan pa comentario.
Otro dos sospechoso den e caso – comerciante Haitiano-Chileno, Rodolphe Jaar y soldad Colombiano, Mario Antonio Palacios – recientemente a keda extradita na Merca pa enfrenta cargo. Jaar a keda aresta na Republica Dominicana na januari, y Palacios na Jamaica na october. Ambos ta acusa di conspiracion pa comete asesinato of secuestro pafo di Merca, y duna sosten material resultando den morto, sabiendo of cu intencion pa material asina ser usa pa ehecuta e conspiracion pa asesina of secuestra.
Mas di 40 sospechoso a keda aresta den e asesinato presidencial, incluyendo 18 ex-soldad Colombiano. Oficialnan di gobierno Colombiano a bisa cu mayoria di e ex-soldadnan a wordo gaña y no tabata sa di e berdadero mision.
