(MedicalExpress.com) – Haiti ta experimentando un regreso no anticipa di e enfermedad contagioso colera, probablemente causa pa escasez di awa potable, cu na su turno ta causa pa un bloqueo di awa potable y combustible na man di e gangnan cu ta domina sectornan importante di capital Port-au-Prince.
Den e reciente aparicion di e enfermedad a fayece por lo menos 7 persona, segun director general di ministerio di salud, Laure Adrien den rueda di prensa. Adrien a aña cu nan tabata lucha pa haya informacion di e hospitalnan.
Colera na 2010, despues di e teremoto mas devastador di historia Haitiano, a cobra alrededor di 10.000 victima. Na 2020 Organizacion Panamericano di Salud (PAHO) a constata un aña completo sin caso di colera. Ministerio di salud a confirma anteriormente un caso na Port-au-Prince, pero a añadi cu tabatin mas caso na Cite Soleil na rand di capital, teritorio di guera entre e gangnan.
Desde luna pasa e gangnan a bloquea e puerto principal di combustible, como protesta contra aumento di prijs di combustible, anuncia pa gobierno. Varios hospital mester a cera o baha nan nivel di operacion pa falta di coriente y combustible pa nan generadornan.
Caribbean Bottling Company, un suministrador clave di awa na boter, a bisa diadomingo pasa cu no por continua produciendo awa, pa falta di diesel pa move nan maquinaria. Transporte via caretera, tanto publico como priva, a bira casi imposible pa mayoria di ciudadano.
Colera ta ser propaga via awa contamina pa resto fecal di un persona cu tin e enfermedad, loke ta haci awa potable limpi un requisito critico. Den añanan recien a surgi henter un discusion na Haiti, tocante e posible introduccion di colera via e Cuerpo di Paz di Nacionnan Uni, cu a interveni despues di e destitucion di gobierno di Jean-Bertrand Aristide. Parti di e tropanan tabata di Nepal, unda colera ta endemico.
